तरुणीला चोरट्याने दाखविला लोकलमध्ये चाकूचा धाक 

संबंधित आरोपीला रेल्वे पोलीसांनी अटक केली; मात्र तरुणी मानसिक धक्क्यात 

अंबरनाथ - अंबरनाथमधली एक तरुणीला एका चोराने चाकूचा धाक दाखवून रेल्वे लोकलमध्ये लुटल्याची घटना घडली आहे. त्यामुळे तिला आता एकटीने प्रवास करण्याची भीती वाटत आहे. शुक्रवारी ही तरुणी रेल्वेतून प्रवास करत असताना एका तरुणाने तिला चाकूचा धाक दाखवून लुटलं होतं. त्यानंतर त्या तरुणीला प्रचंड मानसिक धक्का बसला असून ती भीतीच्या सावटाखाली आहे. तिच्या कुटुंबीयांनी तिची समजूत घालण्याचाही प्रयत्न केला, मात्र तिची भीती कमी झालेली नाही. तरुणीचे वडील नोकरी करत असून आई गृहिणी आहे. त्यामुळे तिच्यासोबत रोजचा प्रवास करणं या दोघांनाही शक्य नाही. त्यामुळे या तरुणीला पुढील काही दिवस महाविद्यालयात न पाठवण्याचा निर्णय तिच्या कुटुंबीयांनी घेतला आहे. तसंच दिवसाढवळ्या होणारे हे गैरप्रकार रोखण्यासाठी रेल्वे पोलिसांची गस्त वाढविणे महत्वाचे आहे. या प्रकरणी पोलिसांनी सोहेल अन्सारी (वय - २०) या तरुणाला अटक केली आहे. मुंब्र्यातील अमृत नगर येथे राहणाऱ्या सोहेलनेच धाक दाखवून या तरुणीला लुटलं. मोबाईल चोर मुंब्रा स्थानकात उतरतानाचे दृश्य सीसीटिव्ही फुटेजमध्ये कैद झाले होते. त्यावरून पोलिसांनी सोहेलला अटक केली होती. सध्या सोहेल पोलीस कोठडीत असून त्याने यापूर्वी देखील चाकूचा धाक दाखवून लूट केल्याचं पोलीस तपासात समोर आलं आहे.