पेल्हारमध्ये अपहरण करून तरुणाची निर्घृणपणे हत्या

पूर्व वैमनस्यातून हत्या झाल्याची पोलिसांना संशय

-मंगेश कराळे

नालासोपारा:- कांदिवली येथे राहणाऱ्या २७ वर्षीय तरुणाचे आरोपींनी गुरुवारी रात्री अपहरण करून गौराईपाड्यातील पार्किंगच्या मोकळ्या जागेत धारदार हत्याराने वार करून निर्घृणपणे हत्या केल्याची घटना घडली आहे. पेल्हार पोलिसांनी शुक्रवारी आरोपी विरोधात हत्येचा गुन्हा दाखल करून गुन्ह्याचा पुढील तपास करत आहे.

कांदिवलीच्या मारुती चाळीत राहणारा सुधीर सिंग (२७) आणि वालईपाडा रोडवरील उपाध्याय चाळीत राहणारा वैभव मिश्रा (२८) हे दोघे गुरुवारी गौराईपाडा परिसरात रूम बघण्यासाठी गेले होते. यावेळी आरोपी रोहन सिंग, मर्दा व इतर ६ ते ७ सोबतच्यांनी दोन रिक्षांमधून येऊन कोणत्यातरी कारणावरून सुधीरचे अपहरण करून नेले. गौराईपाडा परिसरातील यादवेश विद्यालयाच्या बाजूला असलेल्या पार्किंगच्या मोकळ्या जागेत आरोपींनी अंगावर कोयता, दुसरे धारदार हत्याराने वार करून लाकडी बांबू व लाथाबुक्यांनी मारहाण केल्याने गंभीर दुखापत करून जीवे ठार मारले आहे. सुधीर हे पाच वर्षांपूर्वी पांडे नगर परिसरात राहत होता. आता तो कांदिवली येथे परिवारासोबत राहत होता.

१) सदर हत्या ही पूर्व वैमनस्यातून झाल्याची शंका आहे. हत्येचा गुन्हा दाखल केला असून फरार आरोपींचा शोध घेत गुन्ह्याचा पुढील तपास सुरू आहे. आरोपी पकडल्यानंतर ही हत्या नेमकी कश्यामूळे झाली त्याचा उलगडा होईल. - वसंत लब्दे (वरिष्ठ पोलीस निरीक्षक, पेल्हार पोलीस ठाणे)