गणेशोत्सवासाठी प्रशासनाच्या मार्गदर्शक सूचना
By लोकमत न्यूज नेटवर्क | Published: September 10, 2021 04:39 AM2021-09-10T04:39:58+5:302021-09-10T04:39:58+5:30
उस्मानाबाद : कोरोनाच्या अनुषंगाने गणेश उत्सव साजरा करण्याबाबत जिल्हाधिकाऱ्यांनी शासन परिपत्रकान्वये विविध मार्गदर्शक सूचना जारी केल्या आहेत. कोविड-१९ मुळे ...
उस्मानाबाद : कोरोनाच्या अनुषंगाने गणेश उत्सव साजरा करण्याबाबत जिल्हाधिकाऱ्यांनी शासन परिपत्रकान्वये विविध मार्गदर्शक सूचना जारी केल्या आहेत.
कोविड-१९ मुळे उद्भवलेल्या संसर्गजन्य परिस्थितीचा विचार करता या वर्षीचा गणेशोत्सव साध्या पध्दतीने साजरा करण्याचा निर्णय घेण्यात आला आहे. त्याअनुषंगाने सार्वजनिक गणेशोत्सवासाठी गणेशोत्सव मंडळांसाठी राज्य शासनाने मार्गदर्शक सूचना जारी केल्या आहेत. त्यामुळे नगरपालिका आणि स्थानिक प्रशासन यांची यथोचित पूर्वपरवानगी घेणे आवश्यक आहे. संबंधित स्थानिक प्रशासनाचे मंडपाबाबतच्या धोरणाशी सुसंगत असे मर्यादित स्वरुपाचे मंडप उभारण्यात यावेत. या वर्षीचा गणेशोत्सव साध्या पध्दतीने साजरा करणे अपेक्षित असल्याने घरगुती तसेच सार्वजनिक गणपतींची सजावट करताना त्यात भपकेबाजी नसावी. श्रीगणेशाची मूर्ती सार्वजनिक मंडळांकरिता चार फूट व घरगुती गणपतीकरिता दोन फुटाच्या मर्यादेत असावी. या वर्षी शक्यतो पारंपरिक गणेशमूर्तीऐवजी घरातील धातू, संगमरवर आदी मूर्तीचे पूजन करावे. मूर्ती शाडूची पर्यावरणपूरक असल्यास त्याचे विसर्जन शक्यतो घरच्या घरी करावे. विसर्जन घरी करणे शक्य नसल्यास नजिकच्या कृत्रिम विसर्जन स्थळी विसर्जन करण्यात यावे. आरोग्य व सामाजिक संदेशाद्वारे जनजागृती करण्यात यावी, सांस्कृतिक कार्यक्रमांऐवजी आरोग्य विषयक उपक्रम, शिबिरे आयोजित करण्यास प्राधान्य देण्यात यावे, त्याद्वारे कोरोना, मलेरिया, डेंग्यू इ. आजार आणि त्यांचे प्रतिबंधात्मक उपाय तसेच स्वच्छता यांबाबत जनजागृती करण्याचे आवाहन करण्यात आले आहे. गणेशोत्सवानिमित्त कोणतीही शिथिलता देता येणार नसल्याने आरती, भजन, कीर्तन वा अन्य धार्मिक कार्यक्रम आयोजित करताना गर्दी होणार नाही याची दक्षता घेऊन ध्वनिप्रदूषणासंदर्भातील नियमांचे व तरतुदींचे काटेकोरपणे पालन करावे, आदी सूचना करण्यात आल्या आहेत.