ढगाळ वातावरणाचा अस्थमा रुग्णांना धोका

उमरगा : सततच्या ढगाळ वातावरणामुळे हवेतील आर्द्रता व प्रदूषण याचा सर्वाधिक फटका अस्थमा रुग्णांना बसत आहे. कोरोनाचा संसर्ग आणि इतर आजारांना निमंत्रण देणारे सध्याचे वातावरण आहे. विशेषत: अस्थमाच्या जुन्या रुग्णांना सध्या दम्याचा त्रास वाढत आहे. रुग्णालयात अशा रुग्णांची संख्याही वाढलेली दिसून येते. नियमित आहार, व्यायाम व औषधोपचारामुळे अस्थमा रुग्ण निरोगी जीवन जगू शकतात. हंगामी दमा हा ठरावीक कालावधीत (ऑगस्ट-सप्टेंबर) बळावू शकतो आणि उन्हाळ्यात रुग्ण एकदम नॉर्मल राहू शकतो. योग्य उपचार न मिळाल्याने दमा बळावतो, जुनाट होतो आणि हळूहळू श्वासनलिकांत कायमस्वरूपी बदल होऊ लागतात. मग, हा आजार दुर्धर आजारात रूपांतरित होतो, असे डॉक्टर सांगतात.

प्रतिकारशक्ती कमकुवत

श्वसनसंस्थेशी निगडित असलेल्या अस्थमा आजारामुळे रुग्णाची प्रतिकारशक्ती कमी होते. त्यामुळे अशा रुग्णांना इतर विषाणूंचा धोका असतो. अस्थमा रुग्णांना कोराेनाचा फारसा धोका संभवत नसल्याचे अलीकडच्या एका अभ्यासातून समोर आले असले, तरी या रुग्णांनी खबरदारी घेणे गरजेचे आहे.

बालकही अस्थमाचे शिकार

अस्थमामुळे केवळ वयोवृद्धांना नाही, तर युवक व लहान मुलांनाही याचा त्रास होतो. लहान मुलांमध्ये अस्थमाचे प्रमाण फारसे नसले, तरी आनुवंशिकता व ॲलर्जीमुळे काही बालकांमध्ये अस्थमा दिसून येतो. बाल अस्थमा आपोआप नाहीसा होईलच हे सत्य नाही.

ही घ्या काळजी

अस्थमावर डाॅक्टरांनी दिलेले नियमित वापराचे औषध कुठल्याही परिस्थितीत बंद करू नका. औषध वेळेवर घेणे हा महत्त्वाचा उपाय आहे. ॲलर्जीकारक वस्तूंशी संपर्क टाळा. अनेकदा दम्याबरोबर ॲलर्जिक सर्दीसुद्धा सोबत असते. त्यासाठी नाकातील स्टेरॉइड स्प्रे डॉक्टरांच्या सल्ल्यानुसार सुरू करावा.

कोट.......

ढगाळ वातावरणात जुन्या अस्थमा रुग्णांच्या फुप्फुसात नळ्या आकुंचन पावल्यामुळे दम्याचा अटॅक येण्याची शक्यता असते. त्यामुळे अशा रुग्णांनी डॉक्टरांच्या सल्ल्यानुसार पंपाची औषधे नियमित घ्यावीत. जेणेकरून संभाव्य दमाचा अटॅक टाळता येऊ शकतो.

- डॉ. विजय बेडदुर्गे, दमा विकार तज्ज्ञ, उमरगा