सोन्याची बाळी जीवावर बेतली, अल्पवयीन मुलाने ५ वर्षीय चिमुकल्याचा जीव घेतला

सांगवी मार्डीतील धक्कादायक घटना, अकरावीच्या वर्गातील अल्पवयीन मुलाचे कृत्य

तुळजापूर (जि. उस्मानाबाद) : कानातील सोन्याच्या बाळीसाठी ५ वर्षीय बालकाची गळा दाबून निर्घृण हत्या केल्याची थरारक घटना शुक्रवारी पहाटे समोर आली आहे. याप्रकरणी ११ वीच्या वर्गामध्ये शिकणाऱ्या अल्पवयीन आरोपीस ताब्यात घेतले असून त्याने खून केल्याची कबुली दिल्याचे पोलिसांकडून सांगण्यात आले.

याबाबत अधिक माहिती अशी की, तुळजापूर तालुक्यातील सांगवी मार्डी येथील ओम मनोज बागल (वय ५) हा वडिलांकडून पैसे घेऊन तापावरील गोळी आणायला म्हणून गुरुवारी दुपारी घराबाहेर पडला. तो पुन्हा घरी परतलाच नाही. ओम घरी न आल्याने कुटुंबियांनी दिवसभर गावात शोधाशोध केली. मात्र, ओम कुठेच सापडला नाही. त्यामुळे कुटुंबियांनी तुळजापूर पोलीस ठाणे गाठून फिर्याद दिली असता अज्ञाताविरूद्ध अपहरणाचा गुन्हा नाेंदविण्यात आला. शुक्रवारी पहाटे ओम बागल याच्या घरापासून काही अंतरावर असलेल्या एका घरात ओमचा मृतदेह आढळून आल्याने खळबळ उडाली. 

दरम्यान, माहिती मिळताच तुळजापूर पाेलीस घटनास्थळी दाखल झाले असता, ओमच्या कानातील बाळी जबरदस्तीने काढल्याचे दिसले. तसेच गळ्यावरही खुणा हाेत्या. त्यामुळे ओमचा खून झाला असावा, असा प्राथमिक निष्कर्ष पाेलिसांनी काढला. यानंतर तपासाची चक्रे गतिमान करून प्राप्त माहितीच्या आधारे पाेलिसांनी अकरावीच्या वर्गामध्ये शिक्षण घेत असलेल्या एका अल्पवयीन मुलास ताब्यात घेतले. त्याच्याकडे चाैकशी केली असता, त्याने खुनाची कबुली दिल्याचे पाेलिसांकडून सांगण्यात आले. सायंकाळी उशिरापर्यंत या प्रकरणात गुन्हा नाेंद झालेला नव्हता.