१० हजारांवर थाळ्यांतून गरजूंचे पोट तृप्त

उस्मानाबाद : दुसऱ्या लाटेवेळी पडलेल्या लॉकडाऊनमुळे रुग्णांच्या नातेवाइकांचे बाहेर जेवणासाठी हाल सुरू होते. ही बाब लक्षात घेऊन काँग्रेसच्या वतीने जिल्हा रुग्णालयाजवळ मोफत भोजन सेवेचा उपक्रम सुरू करण्यात आला. महिनाभराच्या काळात १० हजारांहून अधिक थाळ्यांचे वितरण करून या उपक्रमाद्वारे गरजूंचे पोट तृप्त करण्यात आले.

प्रदेश काँग्रेसचे कार्याध्यक्ष माजी आमदार बसवराज पाटील यांच्या सूचनेनुसार उस्मानाबाद शहर काँग्रेसच्या वतीने कोरोना काळात नागरिकांची जेवणाची व्यवस्था व्हावी, या हेतूने उस्मानाबाद येथील शासकीय रुग्णालयाजवळ १३ मे पासून मोफत भोजन सेवा सुरू करण्यात आली होती. एक महिना अविरतपणे हा अन्नदानाचा यज्ञ चालविण्यात आला. ३२ दिवस चाललेल्या या उपक्रमात दररोज सायंकाळी ७ ते रात्री ९ या वेळेत रुग्णांचे नातेवाईक व इतर गरजू नागरिकांना पोटभर जेवण व स्वच्छ पिण्याचे पाणी उपलब्ध करून देण्यात आले होते. यादरम्यान दररोज सरासरी ३५० नागरिकांनी या सेवेचा लाभ घेतला. जिल्हा शासकीय रुग्णालयात उस्मानाबाद जिल्हा व परिसरातील रुग्ण उपचार घेत होते. यात ग्रामीण भागातील रुग्णांची संख्या अधिक होती. त्यांची जेवण व पिण्याच्या पाण्याची चांगली सोय या उपक्रमातून झाली. या उपक्रमास जिल्हाधिकारी कौस्तुभ दिवेगावकर, जिल्हा शल्यचिकित्सक डॉ.धनंजय पाटील, नगर परिषद मुख्याधिकारी हरिकल्याण यलगट्टे यांच्यासह विविध क्षेत्रातील मान्यवरांनी भेटी दिल्या. दरम्यान, आता रुग्ण कमी झाल्याने या उपक्रमाची रविवारी सांगता करण्यात आली. या उपक्रमाच्या यशस्वितेसाठी आशिष मोदाणी, जिल्हा उपाध्यक्ष प्रशांत पाटील, शहराध्यक्ष अग्निवेश शिंदे, महिला काँग्रेसच्या डॉ.स्मिता शहापूरकर, माजी नगरसेवक सय्यद नादेरउल्ला हुसैनी, जिल्हा सरचिटणीस जावेद काझी, नगरसेवक सिद्धार्थ बनसोडे, अल्पसंख्याक जिल्हाध्यक्ष सय्यद खलील, माजी नगरसेवक दर्शन कोळगे, राज कुलकर्णी, धनंजय राऊत, युवक काँग्रेसचे उमेश राजेनिंबाळकर, अभिषेक बागल, सुरेंद्र पाटील, अतुल देशमुख, अब्दुल लतीफ, संजय गजधने, सचिन धाकतोडे, प्रेम सपकाळ, सुधीर अलकुंटे यांनी परिश्रम घेतले.