तुळजाभवानी देवीची सिंहासनावर पूर्ववत प्रतिष्ठापना; घटस्थापनेने नवरात्रोत्सव प्रारंभ!

श्री तुळजाभवानी देवीची घोरनिद्रा संपून गुरुवारी रात्री दीडच्या सुमारास भोपी पुजाऱ्यांनी देवीची सिंहासनावर पूर्ववत प्रतिष्ठापना केली.

तुळजापूर (जि. धाराशिव) : महाराष्ट्राची कुलस्वामिनी श्री तुळजाभवानी देवीच्या शारदीय नवरात्र उत्सवास गुरुवारी घटस्थापनेने माेठ्या उत्साहात सुरुवात झाली. मंदिर संस्थानचे अध्यक्ष तथा जिल्हाधिकारी डॉ. सचिन ओंबासे व पत्नी अस्मिता यांच्या हस्ते दुपारी बारा वाजण्याच्या सुमारास पारंपरिक पद्धतीने घटस्थापना करण्यात आली.

श्री तुळजाभवानी देवीची घोरनिद्रा संपून गुरुवारी रात्री दीडच्या सुमारास भोपी पुजाऱ्यांनी देवीची सिंहासनावर पूर्ववत प्रतिष्ठापना केली. यानंतर पारंपरिक धार्मिक विधी होऊन विशेष पंचामृत अभिषेक पूजा झाली असता भाविकांना देवी दर्शनास सोडण्यात आले. सकाळी सहा वाजता देवीची अभिषेक घाट होऊन नित्योपचार पंचामृत अभिषेक पार पडले. यानंतर महंत व भोपे पुजाऱ्यांनी देवीला नैवेद्य दाखवून धुपारती व अंगारा हे विधी पार पडले. यानंतर तुळजाभवानीची विशेष अलंकार पूजा बांधण्यात आली.

दुपारी बारा वाजण्याच्या सुमारास संस्थानचे अध्यक्ष जिल्हाधिकारी डॉ. सचिन ओंबासे यांनी तुळजाभवानीची शासकीय आरती करून गोमुख तीर्थाजवळील घटकलशाची विधिवत पूजा करून सवाद्य मंदिरात आणले. सिंह गाभाऱ्यात ठेवण्यात आलेल्या वावरीत घटकलश ठेवून पारंपरिक पद्धतीने त्याचे पूजन झाल्यानंतर घटस्थापना करण्यात आली. पुढील आठ दिवस चालणाऱ्या विविध धार्मिक विधींसाठी ब्राह्मण वृंदास ओंबासे दाम्पत्याच्या हस्ते वर्णी देण्यात आली. यावेळी उपस्थित पुजारी सेवेकरी व भाविकांनी आई राजा उदे-उदेचा जयघोष केला. या साेहळ्यानंतर मंदिरातील उपदेवतांच्या ठिकाणी घटस्थापना केली.

याप्रसंगी देवीचे महंत, भोपे पुजारी अतुल मलबा, शासकीय उपाध्ये बंडोपंत पाठक, विश्वस्त तथा आमदार राणा जगजितसिंह पाटील, व्यवस्थापक तहसीलदार माया माने, धार्मिक व्यवस्थापक इंतुले, विश्वास कदम, पोलिस उपविभागीय अधिकारी डॉ. नीलेश देशमुख, भोपे पुजारी मंडळाचे अध्यक्ष अमरराजे परमेश्वर, पाळीकर पुजारी मंडळाचे अध्यक्ष बिपीन शिंदे, सज्जनराव साळुंके, उपाध्ये मंडळाचे अध्यक्ष अनंत कोंडो, मकरंद प्रयाग, घटाच्या धान्याचे मानकरी शेटे परिवार यांच्यासह कर्मचारी उपस्थित हाेते.