तीर्थकुंड हडप प्रकरण : फरार देवानंद रोचकरीला अखेर मुंबईतून उचलले

Tirthkund encroachment case Tulajapur : तुळजापूर शहरातील मंकावती तीर्थकुंड हे प्राचीन असून, त्याचा उल्लेख विविध पुराणातही आढळूनही येतो. असे असतानाही तुळजापुरातीलच देवानंद रोचकरी याने या तीर्थकुंडावर मालकी हक्क सांगितला होता.

ठळक मुद्दे शासकीय जागा हडप केल्याबद्दल देवानंद रोचकरी व त्याचा भाऊ बाळासाहेब रोचकरीवर गुन्हा गुन्हा दाखल झाल्याची माहिती कळताच आरोपी रोचकरी तुळजापुरातून पसारराजाश्रयाच्या शोधात त्याने मुंबई गाठली, इथेच पोलिसाच्या पथकाने त्याला ताब्यात घेतले

उस्मानाबाद/तुळजापूर : तीर्थक्षेत्र तुळजापुरातील प्राचीन तीर्थकुंड हडप करुन त्यावर बांधकामाचा घाट घातलेल्या आरोपी देवानंद रोचकरीवर आठवडाभरापूर्वी गुन्हा दाखल झाला आहे. गुन्हा दाखल होताच पसार झालेल्या रोचकरीच्या मागावर पोलिसांची दोन पथके होती. अखेर बुधवारी दुपारी तो मुंबईतील आमदार निवासाच्या कँटीनजवळ थांबलेला असताना पथकाने त्यास ताब्यात घेतले आहे. ( Fugitive Devanand Rochkari finally picked up from Mumbai by Osamanabad Police) 

तुळजापूर शहरातील मंकावती तीर्थकुंड हे प्राचीन असून, त्याचा उल्लेख विविध पुराणातही आढळूनही येतो. असे असतानाही तुळजापुरातीलच देवानंद रोचकरी याने या तीर्थकुंडावर मालकी हक्क सांगितला होता. तीर्थकुंडास विहीर संबोधून ती आपल्या पूर्वजाची मिळकत असल्याचा दावा करीत त्याने बनावट कागदपत्रांच्या आधारे कब्जा केला. यासंदर्भात तक्रारी झाल्यानंतर जिल्हाधिकारी कौस्तुभ दिवेगावकर यांनी चौकशी करुन समितीच्या अहवाला आधारे रोचकरीवर फौजदारी कारवाईचे आदेश दिले होते. या कारवाईला रोचकरीने नगरविकास खात्याकडून स्थिगितीही मिळविली होती. मात्र, त्यावर तत्काळ सुनावणी घेऊन स्थगिती आदेश मागे घेत जिल्हाधिाकर्यांचे आदेश नगरविकासने कायम ठेवले. 

हेही वाचा - खळबळजनक ! प्राचीन तिर्थकुंडच हडपला, कब्जेखोरावर गुन्हा दाखल

१० ऑगस्ट रोजी याबाबतचे आदेश निर्गमित होताच इकडे रातोरात प्रशासनाने पोलीस ठाणे गाठून बनावट कागदपत्रे तयार करीत ऐतिहासिक वारसा असणारी शासकीय जागा हडप केल्याबद्दल देवानंद रोचकरी व त्याचा भाऊ बाळासाहेब रोचकरीवर गुन्हा दाखल केला. दरम्यान, गुन्हा दाखल झाल्याची माहिती कळताच आरोपी रोचकरी तुळजापुरातून पसार झाला. राजाश्रयाच्या शोधात त्याने मुंबई गाठली. इकडे पोलीस अधीक्षक राज तिलक रौशन यांच्या सूचनेनुसार निरीक्षक अजिनाथ काशिद यांनी पोलिसांचे दोन पथक तयार करुन त्याच्या मागावर साेडले होते. दरम्यान, बुधवारी रोचकरी हा मुंबईतील आमदार निवासच्या कँटीनजवळ थांबला असल्याची माहिती मिळताच उपनिरीक्षक राहूल रोटे, कर्मचारी अजय सोनवणे, अमोल पवार यांच्या पथकाने कँटीन परिसर गाठून रोचकरीला ताब्यात घेतले. आता पुढील प्रक्रिया पार पाडून गुरुवारी पहाटेपर्यंत त्यास तुळजापुरात आणले जाणार असल्याची माहिती सूत्रांनी दिली.

हेही वाचा - 'पावसाळ्यात धाडस, मोहीमही फत्ते'; दुर्गम लिंगाणा सर करून फडकवला तिरंगा