नवऱ्याच्या मोबाईलला वैतागल्या बायका; भरोसा सेलमध्ये २९३ तक्रारी

पतीचे परस्त्रीबरोबरचे संबंध असल्याचा संशय, पतीचे दारुचे व्यसन, पती चारित्र्यावर संशय घेतो, पती काम-धंदा न करता सतत मोबाईलवर वेळ घालवितो. यातूनच पती-पत्नीमध्ये सतत वाद होतात. या तक्रारी घेऊन महिला पोलीस ठाण्यात येतात. त्या ठिकाणी अदखलपात्र गुन्हा नोंद करुन त्यांना भरोसा सेलकडे पाठविण्यात येत असते. मार्च २०२० पर्यंत जिल्ह्यात महिला तक्रार निवारण केंद्र सुरु होते. या केंद्राकडे २०१९ मध्ये ४४६ तक्रारी आल्या होत्या. त्यापैकी २२४ प्रकरणे आपसात तडजोडीने मिटली. १३६ प्रकरणे निकाली निघाले. तर एप्रिल २०२० ते नोव्हेंबर अखेर २९३ प्रकरणे भरोसा सेलकडे दाखल झाली होती. त्यातील ९० प्रकरणे आपसात तडजोडीने मिटली. ५ पोस्टेड वर्ग, १६ जणांना कोर्टात जाण्याची समज दिलेली आहे. ३५ प्रकरणे निकाली निघाले, १४७ प्रकरणे प्रलंबित आहेत.

नवरा-बायकोमध्ये होणाऱ्या भांडणाची कारणे

विवाहानंतर काही वर्षात नवरा-बायकोमध्ये वाद होत आहेत. त्यात चारित्र्यावरुन संशय, वाढती व्यसनाधिता याबरोबर दिवसागणिक वाढत चालेला सोशल मिडीयाचा वापरही भांडणाचे कारण भरत असल्याचे भरोसा सेलमधील आलेल्या तक्रारीवरुन पुढे येत आहे. पती दारुच्या आहारी जाऊन पत्नीस मारहाण करीत असल्याने अनेक महिला भरोसा सेलकडे तक्रारी करीत आहेत. शिवाय, काम-धंदा न करता नवरा सतत मोबाईलवर व्यस्त राहत असल्याचे मुख्य कारण आहे.

९० प्रकरणांत समेट

भरोसा सेलमध्ये दाखल करण्यात आलेल्या तक्रारीचा अभ्यास करुन तक्रारदारांना समुपदेशन करण्यात आले. तक्रारदार व समोरील व्यक्तींचे म्हणणे ऐकून दोघांनाही जबाबदारीची जाणीव करुन देण्यात आली. २०२० नोव्हेंबरअखेरर्पंत दाखल झालेल्या २९३ प्रकरणांपैकी ९० प्रकरणांमध्ये समझाेता केल्याचे भरोसा सेलकडून सांगण्यात आले.

कोट...

भरोसा सेलकडे ग्रामीण भागातील महिला पती दारु पित असल्याच्या तक्रारी घेऊन येत आहेत. पती चारित्र्यावर संशय घेतो. तसेच मोबाईलवर टाईमपास करतो. अशा तक्रारी महिला घेऊन येतात. नोव्हेंबर पर्यंत ९० प्रकरणात समझोता झाला आहे. तर ३५ प्रकरणे निकाली काढण्यात आले आहेत.

प्रीती सावंत, पोलीस उपनिरीक्षक,

प्रभारी भरोसा सेल प्रमुख