धूमस्टाइलने महिलेची ६० हजार रुपये किमतीची सोनपोत लंपास

गेल्या काही दिवसांपासून धुळ्यात महिलांच्या गळ्यातील सोनपोत लंपास करण्याच्या घटनांमध्ये वाढ झाली आहे.

धुळे : घराच्या प्रवेशद्वाराजवळ फोनवर बोलत असलेल्या एका ५६ वर्षीय महिलेच्या गळ्यातील ६० हजार रुपये किमतीची सोनपोत दुचाकीवर आलेल्या दोन अज्ञात चोरट्यांनी लंपास केल्याची घटना सोमवारी रात्री ८ वाजेच्या सुमारास जयहिंद कॉलनीत घडली. याप्रकरणी पश्चिम देवपूर पोलिसांत अज्ञात चोरट्यांविरुद्ध गुन्हा दाखल करण्यात आला आहे. गेल्या काही दिवसांपासून धुळ्यात महिलांच्या गळ्यातील सोनपोत लंपास करण्याच्या घटनांमध्ये वाढ झाली आहे. आठ दिवसांपूर्वी जे. के. ठाकरे परिसरात घराच्या बाहेर मैत्रिणीशी बोलणाऱ्या महिलेची सोनपोत अज्ञातांनी धूमस्टाइलने लंपास केली होती. तोच सोमवारी रात्री पुन्हा सोनपोत लंपास केल्याची घटना घडली.

भारती रवींद्र भामरे (वय ५६, रा. जयहिंद कॉलनी, देवपूर, धुळे) या आपल्या घराच्या प्रवेशद्वाराजवळ फोनवर बोलत असताना, दुचाकीवर आलेल्या दोन अज्ञातांनी त्यांच्या गळ्यातील ३ तोळे वजनाची ६० हजार रुपये किमतीची सोनपोत ओरबाडून पोबारा केला. याप्रकरणी भारती भामरे यांनी दिलेल्या फिर्यादीवरून पश्चिम देवपूर पोलिस स्टेशनला अज्ञात चोरट्यांविरुद्ध गुन्हा दाखल करण्यात आला आहे. तपास पोलिस निरीक्षक देशमुख करीत आहेत.