धुळे : महिलेच्या गळ्यातील सोनपोत ओरबाडली देवपुरातील भरवस्तीत रात्रीची घटना, दोघांवर गुन्हा

या प्रकरणी शुक्रवारी पश्चिम देवपूर पोलिस ठाण्यात दोघांविरोधात जबरी चोरीचा गुन्हा दाखल झाला.

धुळे - दवाखान्यातून घरी परत जात असताना कोणीही नसल्याची संधी साधून दुचाकीने भरधाव वेगाने आलेल्या दोघांपैकी एकाने महिलेच्या गळ्यातील सोनपोत ओरबाडून घेतली. ही घटना देवपुरातील क्षिरे काॅलनीत गुुरुवारी रात्री घडली. या प्रकरणी शुक्रवारी पश्चिम देवपूर पोलिस ठाण्यात दोघांविरोधात जबरी चोरीचा गुन्हा दाखल झाला. वाडीभोकर रोडवरील क्षिरे कॉलनीत राहणाऱ्या प्रियंका धीरज छाजेड (वय ३५) या महिलेने पश्चिम देवपूर पोलिसात फिर्याद दाखल केली.

गुरुवारी रात्री सव्वा आठ वाजेच्या सुमारास प्रियंका छाजेड ही महिला दवाखान्यात गेली होती. तेथून घरी परतत असताना मोटारसायकलने दोन तरुण पाठलाग करीत आले. रस्त्यावर कोणीही नसल्याची संधी साधत दुचाकीवर मागे बसलेल्या एकाने गळ्यातील सोनपोत ओरबाडून घेतली. मानेला झटका बसताच प्रियंका यांनी आरडाओरड केली. पण, रात्रीची वेळ असल्याने त्यांच्या मदतीसाठी कोणीही येऊ शकले नाही. तोपर्यंत दोन अनोळखी तरुणांनी पोबारा केला.

१४ ग्रॅम वजनाची ४२ हजार रुपये किमतीची सोनपोत चोरट्यांनी लांबविली. या घटनेनंतर महिला घाबरली. घरी जाऊन त्यांनी हा सर्व प्रकार घरच्या लोकांना सांगितला. स्वत:ला सावरत त्यांनी शुक्रवारी दुपारी पश्चिम देवपूर पोलिस ठाणे गाठत फिर्याद दाखल केली. त्यानुसार, दोन अनोळखी तरुणांविरोधात भादंवि कलम ३९२, ३४ प्रमाणे गुन्ह्याची नोंद करण्यात आली. पोलिस निरीक्षक नितीन देशमुख घटनेचा तपास करीत आहेत.