ठाकरेंच्या शिवसेनेची परिस्थिती वादळात भरकटलेल्या जहाजासारखी; गिरीश महाजनांची टीका

भाजपाचे नेते गिरीश महाजन यांनी माजी मुख्यमंत्री उद्धव ठाकरे यांच्यावर टीका केली आहे.

मंत्री गिरीश महाजन यांनी धुळ्यात पत्रकारांशी संवाद साधताना वंचित बहुजन आघाडीशी केलेल्या युतीवरून उद्धव ठाकरे यांच्यावर चांगलाच निशाणा साधला आहे. शिवसेनेची परिस्थिती वादळात भरकटलेल्या जहाजासारखी झाली असून उद्धव ठाकरे यांनी बाळासाहेब ठाकरे यांच्या विचारांना तिलांजली दिली असल्याच म्हणत उद्धव ठाकरे यांच्यावर जोरदार निशाणा निशाणा साधला आहे. 

धुळे जिल्ह्याचे पालकमंत्री गिरीश महाजन हे आज प्रजासत्ताक दिनानिमित्त धुळ्यात आले होते. मंत्रिमंडळाच्या विस्तारासंदर्भात मंत्री गिरीश महाजन यांनी पक्षश्रेष्ठी जोपर्यंत हिरवा कंदील देणार नाही तोपर्यंत मंत्रिमंडळाचा विस्तार होणार नसल्याचे मंत्री गिरीश महाजन यांनी स्पष्ट केले आहे. 

नाशिक पदवीधर मतदार संघाच्या निवडणुकी संदर्भात अपक्ष उमेदवार सत्यजित तांबे यांच्या पाठिंब्यासंदर्भात विचारणा झाली असता, आम्ही वेट अँड वॉच च्या भूमिकेत असून सध्या भाजपाकडून कुठल्याही उमेदवाराला पाठिंबा उघडपणे जाहीर करण्यात आला नसून, एबी फॉर्म देखील देण्यात आलेला नाही व याबाबत दोन दिवसात पक्षश्रेष्ठींसोबत बोलून निर्णय स्पष्ट होईल असे मंत्री गिरीश महाजन यांनी स्पष्ट केले आहे. देश पंतप्रधान नरेंद्र मोदी यांच्या नेतृत्वात मोठ्या वेगाने प्रगती करत असल्याचे म्हणत मंत्री गिरीश महाजन यांनी प्रजासत्ताक दिनानिमित्त नागरिकांना शुभेच्छा दिल्या आहेत.