डंपरची रिक्षाला धडक; ९ महिन्यांच्या चिमुकलीसह पाच जण जखमी

डंपर चालकाविरुद्ध धुळे तालुका पोलिस स्टेशनला गुन्हा दाखल करण्यात आला.

अतुल जोशी, धुळे : डंपरने प्रवाशी रिक्षाला मागून दिलेल्या धडकेत पाच प्रवासी जखमी झाले. हा अपघात मुंबई-आग्रा महामार्गावरील आर्वी गावाच्या शिवारात असलेल्या गतिरोधकावर ५ ॲाक्टोबर रोजी दुपारी ३.३० वाजेच्या सुमारास घडला. याप्रकरणी १६ रोजी डंपर चालकाविरुद्ध धुळे तालुका पोलिस स्टेशनला गुन्हा दाखल करण्यात आला.

मुंबई-आग्रा राष्ट्रीय महामार्गावर आर्वीच्या दिशेने जाणाऱ्या रिक्षाला (क्र. एमएच १८-एन ७३४२) मागून येणाऱ्या डंपरने (क्र. जीजे ३४-टी ३००७) जोरदार धडक दिली. या धडकेत रिक्षात बसलेले शेख जुबेर शेख सलीम (वय ३२), नाजीया कौसर जुबेर शेख (वय २८), फाईजा जुबेर शेख (वय ५), खदिजा जुबेर शेख (वय ९ महिने), नदिम अंजूम शेख (३२, सर्व रा. लाल सरदार नगर, देवपूर धुळे) हे जखमी झाले. या अपघातात रिक्षाचे नुकसान झाले. याप्रकरणी शेख जुबेर शे. सलीम याने धुळे तालुका पोलिस स्टेशनला दिलेल्या फिर्यादीवरून डंपर चालकाविरुद्ध गुन्हा दाखल करण्यात आला आहे. तपास हेड कॉन्स्टेबल तवर करीत आहेत.