धुळे : एकविरा देवी यात्रोत्सवात चोरी करणारा मालेगावचा चोरटा जेरबंद

धुळ्यात एकवीरा देवी यात्रोत्सवात भाविकांची गर्दी होत आहे.

राजेंद्र शर्मा 

धुळे : धुळ्यात एकवीरा देवी यात्रोत्सवात भाविकांची गर्दी होत आहे. ही संधी साधून चोरट्यांचाही सुळसुळाट वाढलेला आहे. यात्रेत संधी साधून मोबाईल आणि पाकीट चोरणारा चोरट्याला जेरबंद करण्यात देवपूर पोलिसांना यश आले. इजहार अहमद अलताफ अहमद (वय २८, रा. मालेगाव) असे अटकेतील संशयिताचे नाव आहे.

एकवीरा देवीच्या यात्रेत गेेलेले नरव्हाळ येथील भूपेश नारायण जाधव यांचे पाकीट चोरट्याने लांबविले. त्यात ४ हजार ९०० रुपये होते. देवपुरातील न्हावी कॉलनीत राहणारे देवीदास कृष्णा ठाकरे यांचेही पाकीट लांबविण्यात आले. त्यात २ हजार २१० रुपयांची राेकड होती. तसेच विशाखा श्याम अग्रवाल यांचा ५ हजार रुपये किमतीचा माेबाईल चोरट्याने लांबविला.

एका पाठोपाठ चोरीच्या तक्रारी दाखल झाल्यानंतर देवपूर पोलिसांच्या शोध पथकाने गर्दीतून चोरट्याला हुडकून काढले. त्याला ताब्यात घेऊन चौकशी केली असता त्याने गुन्ह्याची कबुली दिली. त्याच्या विरोधात देवपूर पोलिस ठाण्यात भादंवि कलम ३७९ प्रमाणे गुन्ह्याची नोंद करण्यात आली.