टँकरची ट्रकला धडक, सहचालक ठार, शेवाळी बायपासवरील घटना

प्रवीण पप्पूराम धातरवाल (वय २३) असे मयत सहचालकाचे नाव आहे. फरार टँकरचालक विरोधात गुन्हा दाखल झाला.

धुळे : साक्री तालुक्यातील शेवाळी बायपास रस्त्यावर भरधाव वेगाने येणाऱ्या डिझेल टँकरने मालट्रकला धडक दिली. या अपघातात चालक, सहचालक हे दोघेही गंभीर जखमी झाले. ही घटना बुधवारी सकाळी घडली. उपचार घेताना सहचालकाचा मृत्यू झाला. तर चालकावर उपचार सुरू आहेत. प्रवीण पप्पूराम धातरवाल (वय २३) असे मयत सहचालकाचे नाव आहे. फरार टँकरचालक विरोधात गुन्हा दाखल झाला.

सुरत -नागपूर महामार्गावरील साक्री तालुक्यातील शेवाळी बायपास रस्त्यावरील पुलाजवळ बुधवारी सकाळी ७ वाजेच्या सुमारास धुळ्याहून सुरतकडे जाणारा आरजे ४ जीबी ३६५९ क्रमांकाच्या ट्रकला सुरतकडून धुळ्याकडे येणाऱ्या डिझेल टँकरने (जीजे १५ एटी ८७९९) रस्त्याच्या परिस्थितीकडे दुर्लक्ष करून ट्रकला धडक दिली. परिणामी ट्रक उलटला. या अपघातात ट्रकवरील सहचालक प्रवीण पप्पूराम धातरवाल (वय २२, रा. बायतू भाेपजी, जि. बाडमेर, राजस्थान) याच्यासह चालक विरमाराम मुलाराम सियाग (वय ३७, रा. मूडनोकी ढाणी, सरनू, जि. बाडमेर, राजस्थान) हे दोघेही जखमी झाले.

दोन्ही वाहनांचे नुकसान झाले. जखमी अवस्थेत दोघांना रुग्णालयात दाखल करण्यात आले. उपचारापूर्वी सहचालक प्रवीण धातरवाल याचा मृत्यू झाला. याप्रकरणी विरमाराम सियाग यांनी साक्री पोलिस ठाण्यात दिलेल्या फिर्यादीवरून टँकरचालकाविरोधात गुन्हा दाखल करण्यात आला. पुढील तपास सुरू आहे.