ट्रकच्या धडकेत सायकलस्वार गतप्राण

मोराणेनजिक घटना : वाहतुकही रोखली

ठळक मुद्देमोराणे गावाच्या पुलावर गुरुवारी दुपारी हा अपघात झाला़ट्रकच्या धडकेत मोराणे येथील सायकलस्वाराचा जागीच मृत्यूमहामार्गावर गतिरोधकाची मागणी करत वाहतूक रोखली़

आॅनलाईन न्यूज नेटवर्क
धुळे : नागपूर सुरत राष्ट्रीय महामार्गावर धुळ्यानजिक मोराणे गावाजवळ ट्रकने उडविल्याने सायकलस्वाराचा जागीच मृत्यू ओढवल्याची घटना गुरुवारी दुपारी घडली़ घटना घडताच नागरिकांनी गतीरोधकाची मागणी लावून धरली़ यासाठी काही वेळ रास्तारोको झाल्याने तणावाची स्थिती निर्माण झाली होती़ 
धुळे शहरानजिक असलेल्या मोराणे गावाच्या पुलावर गुरुवारी दुपारी दीड ते दोन वाजेच्या सुमारास हा अपघात झाला़ मोराणे गावातील रहिवाशी राजेंद्र आनंदा सोनवणे (५२) हे सायकलने मोराणे फाट्याकडे येत असताना त्यांना ट्रकची जोरदार धडक बसली़ यात त्यांची सायकल दूरवर फेकली गेली़ यात सोनवणे हे रस्त्यावर आपटले गेले़ त्यांच्या डोक्याला जबरदस्त मार लागला़ रक्तबंबाळ झाल्याने त्यांचा जागीच मृत्यू ओढवला़ अपघाताचे हे दृष्य पाहताच मोराणे गावातील ग्रामस्थ आणि महामार्गावर असलेल्या नागरिकांनी घटनास्थळी गर्दी केलेली होती़ संतप्त जमावाने लागलीच रास्तारोको आंदोलन करत वाहतूक रोखली आणि महामार्गवर गतिरोधकाची मागणी लावून धरली होती़ यामुळे काहीकाळ तणावाची स्थिती निर्माण झाली होती़
अपघाताचे वृत्त धुळे तालुका पोलिसांना कळताच मोठ्या फौजफाट्यासह घटनास्थळी दाखल झाले़ पोलिसांनी जमावाला शांत करण्याचा प्रयत्न केला़ त्यानंतर वाहतूक सुरळीत झाल्याने महामार्गावर निर्माण झालेली वाहतुकीची कोंडी मोकळी झाली़