मागील भांडणाची कुरापत काढून दोन गट भिडले; ९ जणांविरोधात गुन्हा

लाकडी दांडक्यासह दगड विटांचा सर्रास वापर.

देवेंद्र पाठक,धुळे : मागील भांडणाची कुरापत काढून दोन गट एकमेकांना भिडले. यात लाकडी दांडक्यासह दगड विटांचा सर्रासपणे वापर झाल्याने तणाव निर्माण झाला. हाणामारी झाल्याने पळापळ झाली. ही घटना शुक्रवारी दुपारी देवपुरातील पितांबर चौक भागात घडली. याप्रकरणी शुक्रवारी सायंकाळी देवपूर पोलिस ठाण्यात ९ जणांविरोधात गुन्हा दाखल करण्यात आला. पोलिस कर्मचारी विश्वनाथ दयाराम शिरसाठ यांनी फिर्याद दाखल केली. 

त्यानुसार, देवपुरातील विष्णू नगर भागातील पितांबर चौकात शुक्रवारी दुपारी दीड वाजण्याच्या सुमारास दोन गट आमनेसामने आले. मागील भांडणाची कुरापत काढून यावेळी वाद निर्माण करण्यात आला. एकमेकांना भिडल्याने शिवीगाळ करण्यात आली. वाद विकोपाला गेल्याने तणाव निर्माण झाला. मारामारी करण्याच्या उद्देशाने आलेल्यांच्या हातात लाकडी दांडके होते. काहींनी दगड आणि विटांचा आधार घेत एकमेकांना मारण्यास सुरुवात केली. हाताबुक्क्याने मारहाण करत एकमेकांना जीवे ठार मारण्याच्या धमक्या देण्यात आल्या. परिणामी स्थानिक नागरिकांमध्ये पळापळ झाल्याने तणावाची परिस्थिती निर्माण झाली होती. 

घटनेची माहिती देवपूर पोलिसांना कळताच पोलिसांचे पथक घटनास्थळी दाखल झाले. साैम्य बळाचा वापर करत गर्दी पांगविण्यात आली. पोलिसांनी ९ जणांना ताब्यात घेतले. याप्रकरणी ९ जणांविरोधात भादंवि कलम १४३, १४७, १४८, १६०, ३२३, ३३६, ३३७, ५०४, ५०६ प्रमाणे गुन्ह्याची नोंद करण्यात आली. घटनेचा तपास सहायक पोलिस उपनिरीक्षक सोनवणे करीत आहेत.