धुळ्यामध्ये दोन वेगवेगळ्या अपघातात दोघांचा मृत्यू

पिंपळनेर पोलिस ठाण्यात अपघाताची नोंद करण्यात आली.

धुळे : साक्री तालुक्यातील सामोडे शिवारासह इदगावपाडा भागात दोन वेगवेगळ्या अपघातात दोघांचा मृत्यू झाला. याप्रकरणी पिंपळनेर पोलिस ठाण्यात अपघाताची नोंद करण्यात आली.

सामोडे शिवारातील घटना

एमएच १५ एएक्स ७३१८ आणि एमएच १८ सीए ९५१४ या दोन दुचाकी साक्री पिंपळनेर रोडवरील सामोडे शिवारात एमएसईबी ऑफिससमोर एकमेकांना धडकल्या. अपघाताची ही घटना सोमवारी दुपारी साडेबारा वाजेच्या सुमारास घडली. या अपघातात राम जगन चौरे याला हाताला, डोक्यासह तोंडाला गंभीर दुखापत झाली तर चुनिलाल वाज्या चौरे यांना डोक्याला मार लागला. दोघांना तातडीने रुग्णालयात दाखल करण्यात आले. उपचार सुरू असताना चुनिलाल चौरे यांचा मृत्यू झाला. तर राम चौरे यांच्यावर उपचार सुरू आहेत. याप्रकरणी राम चौरे यांच्या फिर्यादीवरून एमएच १८ सीए ९४१४ क्रमांकाच्या फरार दुचाकी चालकाविरोधात गुन्हा दाखल झाला.

दुचाकी- कार अपघातात एकजण ठार

सटाणा पिंपळनेर रोडवर साक्री तालुक्यातील इदगावपाडाजवळील आनंद पेट्राेलपंपासमोर एमएच १५ एचवाय ६५३३ क्रमांकाची कार आणि एमएच १८ टीए ३९३४ क्रमांकाची दुचाकी यांच्यात अपघात झाला. ही घटना सोमवारी सायंकाळी साडेपाच वाजेच्या सुमारास घडली. यात शिवा सना खराटे (वय २४, रा. वणी ता. दिंडोरी जि. नाशिक. हल्ली मुक्काम मालाचापाडा पो. पानखेडा ता. साक्री) या तरुणाला गंभीर दुखापत झाली. हाता पायासह डोक्याला मार लागला. दुचाकीचेही मोठ्या प्रमाणावर नुकसान झाले. त्याला रुग्णालयात दाखल करण्यात आले. उपचार सुरू असताना शिवा खराटे या तरुणाचा मृत्यू झाला. याप्रकरणी उत्तम दयाराम पिठे (महादेव कोळी) यांनी दिलेल्या फिर्यादीवरून पिंपळनेर पोलिस ठाण्यात सोमवारी रात्री ८ वाजता गुन्हा दाखल झाला.