प्रतिपंढरपूर बाळदे येथे आषाढीनिमित्त यात्रोत्सव

शिरपूर शहरासह तालुक्यातील विठ्ठल मंदिरांमध्ये कार्यक्रम

 ऑनलाईन लोकमत

शिरपूर,दि.27 - आषाढी एकादशीनिमित्त 4 जुलै रोजी शिरपूर शहरासह तालुक्यातील विठ्ठल मंदिरांमध्ये भरगच्च धार्मिक कार्यक्रमांचे आयोजन करण्यात आले आहे. तालुक्यातील प्रतिपंढरपूर समजल्या जाणा:या बाळदे येथे यानिमित्ताने यात्रोत्सवाचे आयोजन करण्यात आले आहे.  

तालुक्यातील प्रति पंढरपूर बाळदे येथे आषाढी एकादशीनिमित्त यात्रोत्सवाची जय्यत तयारी सुरू आहे. यानिमित्ताने 4 जुलै रोजी बाळदे येथील मंदिरात महाआरती व भजनसंध्येचा कार्यक्रम होणार आहे. तसेच याच दिवशी सकाळी अर्थे ते निमझरी येथे पायी दिंडी सोहळा व पालखी सोहळ्याचा कार्यक्रम होईल.  

बाभुळदे येथे धार्मिक कार्यक्रम 

बाभुळदे गावाजवळील तापी नदीच्या किनारी असलेल्या विठ्ठल मंदिरात आषाढी एकादशीनिमित्त यात्रा भरणार आहे. यानिमित्ताने कीर्तन व भजन सप्ताहाला सुरुवात झाली आहे. दररोज भाविकांची मंदिरांमध्ये गर्दी होत आहे. आषाढी एकादशीच्या दिवशी सकाळी मंदिरात महापूजेचा कार्यक्रम होईल. त्यानंतर कीर्तन, भजन, भारूड व गौळणींचा कार्यक्रम होणार असल्याची माहिती संयोजकांनी दिली.