कापडण्यात तरूणाची आत्महत्या

आत्महत्येचे कारण स्पष्ट 

लोकमत न्यूज नेटवर्क
कापडणे : थर्टीफर्स्टच्या पूर्वसंध्येलाच कापडणे येथे तरूणाने गळफास घेऊन आत्महत्या केल्याची घटना घडली़  ज्ञानेश्वर पाटील असे आत्महत्या केलेल्या तरूणाचे नाव आहे़
 कापडणे येथील नरसिंह चौकातील रहिवासी ज्ञानेश्वर लोटन पाटील (वय २६ वर्षे, अविवाहित) याने रविवारी राहत्या घरी दुपारी ४ वाजेच्या सुमारास दोराने गळफास घेऊन आत्महत्या केली़ आत्महत्येचे कारण स्पष्ट झालेले नाही़ ज्ञानेश्वर लोटन पाटील हा त्याची आई शोभाबाई पाटील व भाचा आणि भाचीसह राहत होता़ रविवारी आई शेतात काम करण्यास गेली असतांना ज्ञानेश्वरने गळफास घेऊन जीवनयात्रा संपवली़ आई सायंकाळी शेतातून परत आली असता तिने घराचा दरवाजा उघडला तेव्हा मुलाने गळफास घेतल्याचे निदर्शनास आले़  गल्लीतील महिला व पुरुषांनी बघण्यासाठी घरात गर्दी केली होती़ पोलीसांना घटनेची माहिती दिली असता त्यांनी मृतदेह खाली उतरवू नये, असे सांगितल्याने एक ते दिड तास मृतदेह तसाच लटकून होता़  पोलीस घटनास्थळी उशीरा पोहोचल्याने नागरिकांनी नाराजी व्यक्त केली़ सायंकाळी ज्ञानेश्वरचा मृतदेह खाली उतरवून पोलीसांनी पंचनामा केला व तो शवविच्छेदनासाठी सोनगीर ग्रामीण रुग्णालयात नेण्यात आला़ ज्ञानेश्वर ट्रकचालकाचे काम करीत होता़ रविवारी जेवणाचा डबा घेऊन तो घरी आला होता़ मयत ज्ञानेश्वर पाटील चे पश्चात आई शोभाबाई लोटन पाटील, दोन मामा, तीन बहिणी, दोन मामा, भाचा, भाची असा परिवार आहे़