विखेंचा घरचा अहेर

राजकारणात कोणीच कोणाचा कायमचा मित्र अथवा शत्रू नसतो हे खरंच. राजकारणातील हा खळाळ परस्परविरोधी ओंडक्यांना एकत्र आणतो, तसा समविचारी ओंडक्यांची ताटातूटही करतो. सगळ्यांनाच सत्तेची ओढ असते. विरोधी पक्षनेतेपदावर बसलेल्या व्यक्तीचा तर एक डोळा कायम मुख्यमंत्रिपदाच्या खुर्चीवर असतो. आजचा विरोधी पक्षनेता उद्याचा मुख्यमंत्री, असे म्हटले जाते. पण मुख्यमंत्रिपदापर्यंत पोहोचण्यासाठी विरोधी पक्षनेत्याने सरकारच्या चुकीच्या धोरणांवर रान उठवून सरकारला सळो की पळो करून सोडायला हवे. जनतेच्या मनात सरकारप्रति रोष उत्पन्न करून विरोधी पक्षाबद्दल विश्वास निर्माण करायला हवा. आजवरच्या विरोधी पक्षनेत्यांनी हेच केले. पण राधाकृष्ण विखे-पाटील त्यास अपवाद आहेत. विखे-पाटलांचा जीव विरोधी पक्षात रमत नाही, ते ‘टिळक भवन’ऐवजी ‘वर्षा’वरच अधिक असतात, सरकारवर तुटून पडण्याऐवजी ते सरकारला सांभाळून घेतात, अशी आजवर दबक्या आवाजात चर्चा होती. पण परवा शिर्डीत विखे यांनी स्वत:च खुलासा करून टाकला की, त्यांना हे सरकार अगदी घरच्यासारखे वाटतं!
खरं तर विखेंनी हा खुलासा करण्याची गरज नव्हती. त्यांच्या कृतीतूनच ते दिसून येत होते. कर्जमाफीचे आंदोलन उभे राहू नये, यासाठी विखेंनी केलेला खटाटोप जगजाहीर आहे. पुणतांब्यातील तथाकथित पुढाऱ्यांना हाताशी धरून शेतकऱ्यांचा संप मोडित काढण्याचा त्यांनी कसा प्रयत्न केला, हे सर्वांनीच पाहिले. एवढी तत्परता तर सत्ताधाऱ्यांनीही दाखविली नव्हती. नागपुरात हिवाळी अधिवेशन सुरू असताना विखे गावी होते. एकनाथ खडसे, पंकजा मुंडे, विनोद तावडे यांच्यावर आरोप झाले तेव्हा विरोधी पक्षनेता म्हणून विखेंनी ब्र उच्चारला नाही. जिल्हा परिषद निवडणुकीकडे तर ते फिरकलेच नाहीत, हा काँग्रेस आमदारांचा आरोपही खोटा नव्हता. थोडक्यात, विखे विरोधी पक्षनेते पदावर राहून सत्ताधाऱ्यांशी सलग वाढवत आहेत, हे त्यांच्या उक्ती आणि कृतीवरून दिसून येते. विखेंसारखा विरोधी पक्षनेता आपण राज्याच्या इतिहासात आजवर पाहिला नाही, हे मुख्यमंत्री फडणवीस यांनी दिलेले प्रशस्तीपत्र बरेच बोलके आहे. या अगोदरच्या युती सरकारच्या काळात विखेंनी काँग्रेस सोडून शिवसेनेशी घरोबा केला होताच. आताही त्यांचे पाऊल भाजपाच्या दिशेने पडत आहे का? की बंधू अशोक विखे यांनी केलेल्या आरोपांच्या चौकशीची फाईल सरकारने उघडू नये म्हणून चाललेली ही धडपड आहे? या साऱ्या प्रश्नांची उत्तरे लवकरच मिळतील. मुख्यमंत्र्यांनी तसे सुतोवाच केले आहे.