उदंड जाहले हवशे - गवशे !

लगाव बत्ती..

- सचिन जवळकोटे

यंदाची निवडणूक पावसाळ्यानंतर आलीय. या काळात गवताप्रमाणं जागोजागी इच्छुकांचं अस्तित्व अकस्मातपणे उगवू लागेल. धरणातल्या पाण्याप्रमाणं नवशांचा उत्साह ओसंडून वाहू लागेल. हौशांच्या महापुरानं अवघा मतदारसंघ ढवळून निघेल...अन् याच महापुरात ‘लक्ष्मी खुळखुळे’वाले ‘गलेलठ्ठ’ मासे आपल्या गळाला लागावेत म्हणून हुश्शाऽऽर गवसे कामाला लागतील. कामाला लावतील.

तेरे-मेरे बीच में
जमाई का क्या काम ?

  अक्कलकोटमध्ये ‘सिद्रामप्पा-सचिनदादा’ टीम व्हर्सेस ‘सिद्धूअण्णा-विजूमालक’ टीमचा मुकाबला भलताच रंगात आलेला; मात्र यात आता एन्ट्री केलीय ‘राधाकृष्ण नगरकरां’च्या जावईबापूंनी. ‘हन्नूर-दुधनी’ संघर्ष असाच भडकत राहिला तर ‘विखे-पाटलां’चा हा मोहरा म्हणे ऐनवेळी पटावर पुढं सरकवणार. तसा शब्दही ‘नगरकरां’नी जावयाला अर्थात आचेगावच्या ‘गणेशरावां’ना दिलाय. म्हणजे ‘कमळा’च्या दोन्ही ‘देशमुखां’ना बाजूला ठेवून ‘माने-देशमुखां’च्या नावाला ‘जयहिंद’ करणार. ‘नगरकर’ पण भलतेच ग्रेट रावऽऽ मुलगा खासदार, स्वत: मंत्री, आता पत्नीलाही तिकडं तिकीट देणार अन् जावयालाही इकडं उभं करणार. व्वाऽऽ व्वाऽऽ ‘हाता’चीच जुनी संस्कृती आता ‘कमळा’लाही आवडू लागणार...लगाव बत्तीऽऽ

‘उत्तर’ची ‘केस’ अन्
    ‘तारीख पे तारीख’..

 ‘थोबडे’ मालकांच्या गळ्यात बळं-बळंच ‘उत्तर’ची ‘केस’ मारण्याचा प्रयत्न ‘प्रकाशअण्णा अन् संतोषभाऊं’नी सुरू केलाय; परंतु ‘मिलिंद’रावही भलतेच हुश्शाऽऽर. कॉम्प्लिकेटेड केस ढिली करणं एकवेळ सोप्पं असतं; मात्र टफ इलेक्शन जिंकणं खूप त्रासदायक असतं, हे त्यांना पुरतं  ठावूक...म्हणूनच की काय किचकट निवडणूक लढविण्यापेक्षा सोप्पी केस लढविण्याकडेच त्यांचं अधिक लक्ष. तरीही ‘मनोहरपंत-चेतनभाऊ’ हातात हात घालून त्यांच्याकडे अंतिम सुनावणीसाठी हेलपाटे मारताहेत. पाहूया...किती दिवस चालणार ‘मिलिंद’रावांचा ‘तारीख पे तारीख’ सिलसिला.

‘दक्षिण’मध्येही अजून
एक नवा ‘कॉन्ट्रॅक्टर’..

‘दक्षिण’मध्येही अजून एका नव्या ‘कॉन्ट्रॅक्टर’ची चर्चा सुरू झालीय. आता अगोदरचे दोन कॉन्ट्रॅक्टर कोण हे ‘बापू’ अन् ‘मालकां’ना विचारत बसू नका. मद्रयातील ‘पवारांचे संतोष’ पुण्यात जाऊन ‘बिल्डर’ बनलेले; मात्र त्यांना ‘दक्षिण’मध्ये उभं करण्यासाठी ‘युवराज टीम’ भलतीच कामाला लागलीय. सा-याच पक्षातील अतृप्त आत्म्यांना एकत्र आणून प्रस्थापितांची शांती करण्याचा घाट घातला गेलाय. सत्तेपासून वंचित राहिलेले हे सारे नेते एकत्र आल्यानं ‘दक्षिण’मध्ये किती चमत्कार घडेल, हे याक्षणी कुणाला सांगता येईनासं झालंय...मात्र ‘दोन्ही कारखानदारां’ची डोकेदुखी वाढली हे निश्चित.
माळशिरसमध्ये नव्या उमेदवाराचा ‘संकल्प’
माळशिरसमध्ये नव्या उमेदवाराचा ‘संकल्प’ ‘अकलूजकरां’नी सोडला असला तरी ‘जानकरां’नीही सतत आपल्या ‘सकट’ राहणाराच नेता हवा, याची ‘उत्तम’ आखणी केलीय. आता या दोघांमध्ये ‘वर्षा’वर कुणाची अधिक चांगली लिंक, यातच नव्या नावाचं उत्तर लपलेलं; मात्र या दोघांच्या वादात ऐनवेळी ‘हाफचड्डी’वाल्यांनी ‘आम्ही सातपुते’ म्हणत नवा चेहरा मुंबईहून पाठवून दिला तर ‘राम’ राम मंडळीऽऽ

थोरले दादा तर अजूनबी
जुन्या पार्टीमंदीच हायती न्हवं ?

असो. अकलूजच्या कार्यकर्त्यांना ‘माळशिरस’पेक्षा ‘माढा’ टापूतच अधिक रस. ‘निमगावकर दादा’ ऐनवेळी ‘कमळ’ घेऊन उभारले तर ‘अकलूजकर दादां’नीही ‘घड्याळ’ बांधून ‘माढ्यात’ उतरायला हरकत नसावी, असाही एक नवा मतप्रवाह...कारण म्हणे अधिकृतपणे ‘कमळ’ घेऊन केवळ ‘धाकले दादा’ फिरताहेत. ‘थोरले दादा तर अजूनबी जुन्या पार्टीमंदीच हायती न्हवं ?’ हा सवाल खुद्द कार्यकर्तेच करताहेत. ग्रेटऽऽ माढा लोकसभा मतदारसंघातला कोणता नेता कुठल्या पक्षात, याचं अपडेट ‘गुगल’वाल्यांनी तासा-तासाला करायला हवं.

उजनी जलाशय माढा पट्ट्यात..
.. मासा टिपणार अकलूजमध्ये !

‘अकलूज’मध्ये नुकतंच मत्स्यविकास प्रशिक्षण शिबीर घेण्यात आलं. यासाठी पुढाकार घेतला होता खुद्द ‘थोरले दादा अकलूजकर’ यांनीच. या शिबिरात माढ्यातूनही सर्वाधिक मंडळी आलेली. परिसंवादाचा विषय मासे जगविण्याची.. खाजगीत चर्चा मात्र ‘तानाजीरावां’च्या गळाला कोणता मासा लागतो त्याचीच. खरंतर, उजनी जलाशय माढा पट्ट्यात. तिथं हे शिबीर घेण्याऐवजी अकलूजमध्ये माढ्याच्या सा-या विरोधकांना एकत्र आणून ‘थोरल्या दादां’नी नेमका कोणता मासा टिपला, याचं उत्तर ‘टेंभुर्णीकर अन् भीमानगर’चे ‘संजू’च देऊ शकतील. लगाव बत्ती...

( लेखक 'सोलापूर लोकमत'चे निवासी संपादक आहेत.)