मेस्सीच्या गोलमुळे बार्सिलोना विजयी, चॅम्पियन्स लीगमध्ये युवेंट्सचा उडवला ३-० असा धुव्वा

स्टार खेळाडू लिओनेल मेस्सीने केलेल्या २ गोलच्या जोरावर बार्सिलोना एफसी संघाने चॅम्पियन्स लीगमध्ये विजयी सुरुवात केली. मेस्सी मॅजिकच्या जोरावर बार्सिलोनाने युवेंट्सचा ३-० असा धुव्वा उडवला.

बार्सिलोना : स्टार खेळाडू लिओनेल मेस्सीने केलेल्या २ गोलच्या जोरावर बार्सिलोना एफसी संघाने चॅम्पियन्स लीगमध्ये विजयी सुरुवात केली. मेस्सी मॅजिकच्या जोरावर बार्सिलोनाने युवेंट्सचा ३-० असा धुव्वा उडवला.
कॅम्प नाऊ स्टेडियममध्ये मंगळवारी रात्री झालेल्या या सामन्यात मेस्सीच्या धडाक्यापुढे युवेंट्सची बचावफळी पुर्ण खिळखिळी झाली. सामन्याचे पहिले सत्र जवळपास गोलशून्य बरोबरीत राहणार होते. मात्र, पहिले सत्र संपण्यास काही सेकंद शिल्लक असतानाच ४५ व्या मिनिटाला मेस्सीने गोल करत संघाला १-० असे आघाडीवर नेले. यानंतर दुस-या सत्रात बार्सिलोनाने आणखी आक्रमक पवित्रा घेतला. या वेळी, इवान रेकिटिन याने ५६ व्या मिनिटाला गोल करताना संघाची आघाडी २-० अशी भक्कम केली. दोन गोलच्या पिछाडीमुळे युवेंट्स संघावरील दडपण स्पष्ट जाणवू लागले. यातूनच त्यांच्याकडून काही चुकाही होऊ लागल्या. याचा अचूक फायदा घेत मेस्सीने पुन्हा सगळी सूत्रे आपल्याकडे घेत ६९ व्या मिनिटाला तिसरा गोल करून बार्सिलोनाला ३-० अशी एकतर्फी आघाडी मिळवून दिली. हीच आघाडी अखेरपर्यंत कायम राखताना बार्सिलोनाने यंदाच्या मोसमाची विजयी सुरुवात करताना दिमाखदार सलामी दिली. (वृत्तसंस्था)