वाघाच्या हल्ल्यात वृद्ध महिला ठार, गडचिरोली तालुक्यातील घटना

सरपण गोळा करताना वाघाने केला हल्ला

गडचिराेली : जंगलात सरपण गोळा करण्यासाठी गेलेल्या महिलेला वाघाने हल्ला करून ठार केल्याची घटना शुक्रवार २३ डिसेंबर राेजी दुपारी १२:१५ वाजताच्या सुमारास दिभना बिटातील कं.नं. ५६५ मध्ये घडली. ताराबाई बाबुराव लाेनबले (६५) रा. राजगाटा माल असे ठार झालेल्या वृद्ध महिलेचे नाव आहे.

ताराबाईची शेती दिभना-कळमटाेला मार्गापासून पश्चिम दिशेला आहे. त्यांच्या शेतीला लागूनच जंगल आहे. झाडू तयार करण्यासाठी लागणारे गवत कापण्याकरिता ताराबाई सकाळी ११ वाजताच्या सुमारास तिची मुलगी व इतर महिलांसह घरून निघाली. ती शेतशिवारात सरपण गोळा करीत हाेती. तिच्या जवळच मुलगीसुद्धा हाेती. याचवेळी परिसरात दबा धरून बसलेल्या वाघाने हल्ला केला; परंतु या हल्ल्यातून मुलगी बचावली तर ताराबाई सापडली. ताराबाईच्या मानेला पकडून वाघाने तिला जंगलाच्या दिशेने फरफटत नेले. यात ताराबाईचा जागीच मृत्यू झाला. घटनेची माहिती  मिळताच वनाधिकाऱ्यांनी घटनास्थळ गाठले व पंचनामा केला.