सी-६० पोलिसांची एसटी चालकाला मारहाण

सेमाना-वाकडीदरम्यान एसटीबसने धडक दिल्याने सी-६० चा जवान जखमी झाला.

गडचिरोली : सेमाना-वाकडीदरम्यान एसटीबसने धडक दिल्याने सी-६० चा जवान जखमी झाला. त्यामुळे संतप्त झालेल्या सी-६० जवानांनी बसस्थानकात जाऊन बसचालक चंद्रशेखर रायसिडाम याला मारहाण केली. सदर घटना रविवारी सकाळी १०.३० वाजताच्या सुमारास घडली.
एमएच ३३ एन ८६६९ क्रमांकाच्या दुचाकीने सी-६० चे जवान चामोर्शीवरून गडचिरोलीकडे येत होते. दरम्यान यावेळी एमएच ०६-५७९८८ क्रमांकाची बस सुध्दा चामोर्शीवरूनच गडचिरोलीकडे येत होती. सेमाना वाकडीदरम्यान ओव्हरटेक करताना बसची दुचाकीला धडक बसली. यामध्ये सी-६० चे जवान जखमी झाले. त्यांनी बसस्थानकात येऊन रायसिडाम यांना मारहाण केली. ही बाब एसटी कर्मचाऱ्यांना माहित होताच एसटी कर्मचाऱ्यांनी पोलिसांना फोन करून मारहाणीबाबतची माहिती दिली. ठाणेदार विजय पुराणिक, पीएसआय मुनगेलवार यांनी बसस्थानक गाठून मारहाण करणाऱ्या दोन जवानांना ताब्यात घेतले. जवळपास अर्धा तास बसेस सोडण्यात आल्या नाही. बसचालक व सी-६० चे जवान यांच्यामध्ये आपसी समझोता झाल्याने याबाबतची तक्रार पोलीस स्टेशनमध्ये केली नाही. (नगर प्रतिनिधी)