मालवाहूची दुचाकीला धडक, एक ठार, सात जखमी

भामरागड मुख्य मार्गावर आलापल्लीपासून १२ किमी अंतरावरील तलवाडा गावाजवळ दुचाकी व पीकअप मालवाहू वाहनाची समोरासमोर धडक होऊन झालेल्या भिषण अपघातात एक जण ठार तर सात जण जखमी झाले. ही घटना बुधवार, ३ एप्रिल रोजी दुपारी १२.३० वाजताच्या सुमारास घडली.

लोकमत न्यूज नेटवर्क
आलापल्ली : भामरागड मुख्य मार्गावर आलापल्लीपासून १२ किमी अंतरावरील तलवाडा गावाजवळ दुचाकी व पीकअप मालवाहू वाहनाची समोरासमोर धडक होऊन झालेल्या भिषण अपघातात एक जण ठार तर सात जण जखमी झाले. ही घटना बुधवार, ३ एप्रिल रोजी दुपारी १२.३० वाजताच्या सुमारास घडली.
या अपघातात व्यंकना मेक्कलवार (४०) रा. भामरागड हे दुचाकीस्वार जागीच ठार झाले. जखमींमध्ये पीकअप वाहनातील साईनाथ गुरनुले (४०) रा.चपराळा, समीर शिकदा (४०) रा. कांचनपूर, मारोती बिच्चू आदे (५९) रा. चपराळा, प्रकाश जयराम आदे (४२) रा. चपराळा, अशोक गणू कावळे (४२) रा. चपराळा, महेश मनोरंजन रॉय (२७) रा.कांचनपूर आदींचा समावेश आहे.
बुधवारला भामरागड येथे आठवडी बाजार असल्याने पीकअप वाहन (एमएच ३३ जी १६४) भामरागडकडे येत होते. दरम्यान दुचाकीने (एमएच ३३ एन ३०१०) शिवराम गुडीपाका व व्यंकना हे दोघे जण आलापल्लीकडे येत होते. या दोन्ही वाहनांची समोरासमोर धडक झाली. यात पीकअप वाहन उलटले.
या अपघातातील जखमींना तातडीने १०८ क्रमांकाच्या रूग्णवाहिकेने रूग्णालयात हलविण्यात आले. सात जखमींपैकी काही जणांची प्रकृती गंभीर असल्याची माहिती आहे. शिवराम लिंगाची गुडीपाका (५५) रा.भामरागड याला पुढील उपचारासाठी गडचिरोलीला हलविण्यात आले आहे. पीकअप वाहनामधून एकूण नऊ जण प्रवास करत होते.