आरमोरीत साकारतेय जम्मू-काश्मीरच्या चंडीमाताचे हुबेहुब मंदिर, होणार बर्फवृष्टी

नवदुर्गा उत्सव मंडळाचा पुढाकार : कनकमाता मंदिराची प्रतिकृती

महेंद्र रामटेके 
लोकमत न्यूज नेटवर्क 
आरमोरी : नवरात्र दुर्गोत्सवासाठी विदर्भात प्रसिद्ध असलेल्या आरमोरी शहरात यावर्षी नवदुर्गा उत्सव मंडळ मोटारस्टँडच्या वतीने आंध्र प्रदेश राज्यातील विजयवाडा येथील कनकमाता मंदिराची व जम्मू काश्मीरमधील किस्तवाड जिल्ह्यातील मचेल येथील मचेल चंडीमाता मंदिराची प्रतिकृती साकारली जात आहे. विशेष म्हणजे या प्रतिकृतीच्या माध्यमातून भाविकांना साक्षात बर्फवृष्टी पाहायला मिळणार आहे. भाविकांना बर्फाच्छादित भागातून आवागमण करावे लागणार आहे.

आजपर्यंत साकारलेल्या इतर मंदिरांच्या प्रतिकृतीपेक्षा ही प्रतिकृती आकाराने, विस्ताराने सर्वात मोठी असणार आहे. सदर प्रतिकृती बघण्यासाठी दरवर्षीप्रमाणे याही वर्षी लाखो भाविकांचा मोठा जनसागर उसळणार आहे. नवदुर्गा उत्सव मंडळाचे पदाधिकारी मागील ४१ वर्षांपासून निरनिराळ्या राज्यातील मंदिराच्या प्रतिकृती साकारत आहे. 

येथील नवरात्र उत्सव बघण्यासाठी केवळ विदर्भातीलच नव्हे तर इतर राज्यांतील अनेक जाती-धर्माचे लोक येत असतात. यावर्षी या मंदिराची प्रतिकृती १० हजार स्केअर फूटमध्ये असणार असून, तिची उंची जवळपास ५० फूट आहे. यापूर्वी या नवदुर्गा उत्सव मंडळाने वैष्णोदेवी, बंबलेश्वरी, अमरनाथ, पंचतत्त्व, शेगाव-शिर्डी, महल, पाताल भैरवी, पद्मनाथन, चार धाम, व्दारका, मथुरा, वृंदावन, अष्टविनायक, सर्वधर्मसमभाव, सत्यम शिवम सुंदरम, तिरुपती बालाजी, अक्कलकोट आदींसह अनेक प्रतिकृती साकारलेल्या आहेत. 

कनकमाता मंदिर प्रतिकृतीचे काम अंतिम टप्प्यात आले असून, गेल्या महिनाभरापासून कोलकाता येथील आर्किटेक्चर मंडळ व २० ते २५ मजूर ही प्रतिकृती बनविण्यासाठी अहोरात्र मेहनत घेत आहेत. ही प्रतिकृती नवरात्र उत्सव मंडळाच्या कल्पनेतून साकार होत आहे. 

मंडळाने मागील ४० वर्षांपासून विविध असे देखावे सादर केले आहे. ही प्रतिकृती पाहण्यासाठी परराज्यांतून लोक येत असल्यामुळे व विदर्भात आरमोरी दुर्गोत्सव प्रसिद्ध असल्याने पोलिस प्रशासनानेही आपली जय्यत तयारी सुरू केली आहे. 

महिषासुर राक्षसाचा वध पाहायला मिळणार
यावर्षी या मंदिराची प्रतिकृती तीन मजल्यांची असून, भाविक भक्तांना मुख्य प्रवेशव्दाराजवळ पहाडीतून आतमध्ये प्रवेश करावा लागणार आहे. यानंतर भाविकांना कनक दुर्गामातेचे दर्शन होणार आहे. पुढे गेल्यानंतर भाविकांना बर्फाच्छादित भागातून मार्ग काढावा लागून तिथे रणचंडी माता मंदिराचे व मातेचे दर्शन होणार आहे. शेवटी दुर्गामातेचा भव्य दरबार पाहायला मिळणार आहे. ज्यात दुर्गा भवानीमाता महिषासुर राक्षसाचा वध करताना दिसणार आहे. सदर प्रतिकृती डोळ्यांचे पारणे फेडणारी आहे.

विजयवाडातून आणणार मातेची ज्योत
घटस्थापनेला यावर्षी नवरात्र दुर्गा उत्सव मंडळाचे पदाधिकारी आंध्र प्रदेश राज्यातील विजयवाडा येथील कृष्णा नदीच्या काठावर असणाऱ्या कनक दुर्गा माता मंदिरात ज्योत आणण्यासाठी जाणार असून, या ज्योतीचे आगमन आरमोरी शहरात ३ ऑक्टोबरला सकाळी ९ वाजता होणार असून, लाखो भाविकांना या ज्योतीचे दर्शन घ्यावे, असे आवाहन नवदुर्गा उत्सव मंडळ मोटार स्टँडच्या पदाधिकाऱ्यांनी केले आहे.