वडसा रेल्वेस्टेशनचे डिजिटलायझेशन

गडचिरोली जिल्ह्यातील एकमेव असलेल्या वडसा रेल्वे स्थानकाने आधुनिकीकरणात कात टाकली आहे.

सुरक्षेत वाढ : वेळेचीही होणार बचत;रेल्वेगाडी आवागमनासंदर्भात आधुनिकीकरण
देसाईगंज : गडचिरोली जिल्ह्यातील एकमेव असलेल्या वडसा रेल्वे स्थानकाने आधुनिकीकरणात कात टाकली आहे. वडसा रेल्वे स्टेशनचे डिजिटलायझेशन झाल्याने येथील रेल्वेगाडी आवागमनाच्या सुरक्षेत वाढ झाली आहे. शिवाय रेल्वेस्थानकाच्या कामकाजाच्या वेळेतही बचत होणार आहे.
बदलत्या तंत्रज्ञानासह वडसा रेल्वे स्थानकाने आधुनिक तंत्रज्ञानाचा अंगिकार केला आहे. देसाईगंज येथील रेल्वे स्थानक वडसा रेल्वेस्टेशन म्हणून ओळखले जाते. इंग्रजांच्या कार्यकाळापासून अस्तित्त्वात असलेल्या वडसा रेल्वे स्टेशनवरील संपूर्ण रेल्वे आवागमन वाहतूक मॅन्युअल होती. रस्ता रहदारीवरील गेट पाडणे, दोन रेल्वे गाडीची क्रासिंग, रेल्वेगाडी आवागमनासाठी देण्यात येणारे सिग्नल यासाठी टोकण प्रणाली कार्यान्वित होती. सदर प्रणाली किचकट व क्लिष्ट होती. यात वेळेचा अपव्यय तसेच असुरक्षिता निर्माण होत होती. तेव्हा पासून आतापर्यंत हीच कार्यपद्धती अवलंबिल्या जात होती.
दरम्यान वडसा रेल्वे स्टेशनचे आधुनिकीकरण करण्याबाबत वडसा रेल्वे सलागार समितीने खा. अशोक नेते यांना तसेच दक्षिण पूर्व मध्य रेल्वेचे विभागीय व्यवस्थापकांना तसेच केंद्रीय रेल्वे मंत्र्यांकडे वारंवार पाठपुरावा केलेला होता. वडसा रेल्वे स्टेशनची डिजिटल कार्यपद्धती अधीक्षक पी. एस. भोंडे, वरिष्ठ स्टेशन मास्टर संजय कुमार, कनिष्ठ स्टेशन मास्टर रितेश कुमार हाताळत आहेत. (तालुका प्रतिनिधी)

संगणकीकरणाने कामात गतिशीलता
वडसा रेल्वे स्टेशनवर रेल्वेगाडी आवागमनसंदर्भात आमूलाग्र बदल होऊन मॅन्युअल पद्धती संपुष्टात आणून कम्पूटराईज झाला असून रेल्वे स्टेशन डिजिटल झाले आहे. यात दोन गाडीची क्रासिंगच्या दरम्यान कमीतकमी १० ते २० मिनिटांची बचत होत असून सोबतच सुरक्षितेत वाढ होणार आहे. पूर्वी सिग्नल सिस्टिममध्ये बिघाड आल्यास रेल्वेगाडीला रेल्वे स्थानकावर आगमन होण्यास फारच विलंब होत होता. मात्र आता संपूर्ण कार्यपद्धती डिजिटल होऊन कम्पूटराईज झाल्याने आता वैकल्पिक सिग्नलची व्यवस्था केल्याने वेळेचा अपव्यय थांबून बचत होणार आहे. तसेच इंग्रजांच्या कार्यकाळापासून प्रचलित कार्यपद्धतीत रस्ता रहदारीवरील गेट पाडण्यासाठी जवळ पास तब्बल २० ते २५ मिनिटे लागत होती. व वाहतूक ठप्प होत होती. आता डिजिटल झाल्याने १० ते १५ मिनीटे लागणार आहेत.