शेणखताच्या ढिगाऱ्यांमुळे आराेग्य धाेक्यात

भेंडाळा : चामाेर्शी तालुक्यातील भेंडाळा परिसरातील मुरखळा-कान्होली मार्गावर मुरखळा गावातील शेतकरी अनेक वर्षांपासून शेणखताचे ढिगारे टाकतात. त्यामुळे नागरिकांचे आराेग्य धाेक्यात आले आहे.

गावापासून काही अंतरावर शेण खत ढिगारे दिसून येतात. याच मार्गावर लोकमान्य विद्यालय आहे. त्यामुळे विद्यार्थी ये-जा करीत असतात. रस्त्याच्या अगदी बाजूला खताचे ढिगारे टाकण्यात आले आहे. उंच असलेल्या ढिगाऱ्यावरून कचरा खाली उतरून रस्त्यापर्यंत पाेहचताे. रस्ता अरुंद होत चालल्यामुळे रस्त्याने वाहन आले तर बाजूला सरकण्यास जागा राहत नाही. दोन्ही बाजूला शेतजमीन आहे. पिकांच्या संरक्षण होण्यासाठी शेतकरी कुंपण करतात. रस्ता अरूंद असल्याने या रस्त्याने ये-जा करणे तारेवरची कसरत होत चालली आहे. या मार्गावर कोरोना संकट येण्यापूर्वी गडचिरोली आगाराची बस सुरु होती. शेणखताचे ढिगारे हटवावे अशा सूचना अनेकवेळा संबंधित शेतकऱ्यांना देण्यात आल्या आहेत. मात्र

आम्हाला पर्यायी जागा नसल्याने रस्त्यावर शेणखत ढिगारे टाकावे लागत आहे असे शेतकरी सांगतात. सार्वजनिक रस्त्याचा आपल्या स्वतःच्या हितासाठी वापर करणे अयोग्य आहे. याचा त्रास इतरांना सहन करावा लागत आहे. या मार्गावर दिवसभर वाहनांची वर्दळ असते. त्यामुळे गंभीर अपघात होण्याची शक्यता नाकारता येत नाही. शेतकऱ्यांनी आपल्या हितासोबत इतरांचा विचार करून तत्काळ रस्त्यावरील शेणखत ढिगारे हटवावे अशी मागणी होत आहे.