गडचिरोली जिल्हयातील अहेरीच्या उपजिल्हा रुग्णालयाला लागली आग

गडचिरोली जिल्ह्याच्या दक्षिण भागातील महत्वपूर्ण शहर आणि आत्राम राजघराण्याचे मुख्यालय असलेल्या अहेरी येथील उपजिल्हा रुग्णालयात सोमवारी दुपारी १ वाजताच्या सुमारास आग लागली.

ठळक मुद्देभरती रुग्णांची धावपळ वायरिंगसह लाखोंचे महागडे साहित्य जळून खाक

लोकमत न्यूज नेटवर्क
गडचिरोली : गडचिरोली जिल्ह्याच्या दक्षिण भागातील महत्वपूर्ण शहर आणि आत्राम राजघराण्याचे मुख्यालय असलेल्या अहेरी येथील उपजिल्हा रुग्णालयात सोमवारी दुपारी १ वाजताच्या सुमारास आग लागली. यात जीवित हानी झाली नसली तरी टेलिमेडिसीन रुममधील संगणक, सोनोग्राफी मशिन, एअर कंडिशनर असे ५० लाखांपेक्षा अधिक किमतीचे साहित्य जळून खाक झाले.
विद्युत तारांमधील शॉर्ट सर्किटने ही आग लागली. ५० खाटांच्या या रुग्णालयात जवळपास ७० रुग्ण भरती होते. टेलिमेडिसीन रुममधील विद्युत तारांनी पेट घेतल्याचे लक्षात येताच सर्व रुग्णांना बाहेर काढण्यात आले. महावितरण कंपनीच्या कर्मचाऱ्यांनी माहिती मिळताच विद्युत पुरवठा खंडित केला. त्यानंतर रुग्णालयातील अग्निशमन यंत्रांनी आणि टाकीतील पाण्याचा मारा करून आगीवर नियंत्रण मिळविण्यात आले.
रुग्ण भरती असलेल्या दोन्ही वॉर्डमध्ये ही आग पसरली नाही. मात्र अंतर्गत भागात सर्वत्र धूर पसरल्याने भरती असलेल्या रुग्णांची तारांबळ उडाली. त्यांना दुसऱ्या एका वॉर्डमध्ये स्थानांतरित करण्यात आले आहे. या आगीत विद्युत पुरवठ्याची वायरिंग जळाल्यामुळे रूग्णालयाचा विद्युत पुरवठा सुरळीत होण्यासाठी वेळ लागणार आहे. त्यामुळे वैद्यकीय उपचारांसह शस्त्रक्रिया ठप्प राहण्याची शक्यता आहे.
विशेष म्हणजे आग विझविण्यासाठी अहेरी नगर पंचायतची अग्निशमन यंत्रणा पूर्णपणे कुचकामी ठरली. सात महिन्यांपूर्वीच नगर पंचायतला ८५ लाख रुपयांच्या खर्चातून अग्निशमन वाहन देण्यात आले. मात्र प्रशिक्षित कर्मचारीच नसल्यामुळे हे अग्निशमन वाहन शोभेचे ठरले. ही आग विझविण्यासाठी त्याचा काहीही उपयोग होऊ न शकल्यामुळे संताप व्यक्त केला जात आहे.

रुग्णालयाची वायरिंग खूप जुनी आहे. मशिनरी आधुनिक लागल्या असल्यामुळे त्याअनुषंगाने वायरिंगमध्ये योग्य तो बदल करणे गरजेचे आहे. वायरिंग दुरूस्तीसाठी यापूर्वीच जिल्हा शल्य चिकित्सकांकडे निधीची मागणी केली आहे. मात्र निधी मिळाला नसल्यामुळे दुरूस्ती होऊ शकली नाही.
- डॉ.कन्ना मडावी, अधीक्षक, उपजिल्हा रुग्णालय, अहेरी