तीन वेगवेगळ्या अपघातांत पाच गंभीर जखमी

बुधवारी जिल्ह्याच्या कुरखेडा तालुक्यातील नान्ही, चामोर्शी तालुक्यातील घोट व अहेरी तालुक्यातील आलापल्ली येथे बुध्वारी झालेल्या तीन अपघातात एकूण ५ इसम गंभीर जखमी झाले.

कुरखेडा/घोट/आलापल्ली : बुधवारी जिल्ह्याच्या कुरखेडा तालुक्यातील नान्ही, चामोर्शी तालुक्यातील घोट व अहेरी तालुक्यातील आलापल्ली येथे बुध्वारी झालेल्या तीन अपघातात एकूण ५ इसम गंभीर जखमी झाले. यापैकी अनेकांची प्रकृती गंभीर असल्याने त्यांना चंद्रपूर व नागपूरला हलविण्यात आल्याची माहिती आहे.

भरधाव महेंद्रा पीकअप वाहनाने दुचाकीला धडक दिल्याने दुचाकीवरील दोघेजण गंभीर जखमी झाल्याची घटना कुरखेडापासून तीन किमी अंतरावर नान्ही येथे बुधवारी दुपारी १२ वाजताच्या सुमारास घडली.
खामतळा येथील चरणदास जेंगठे हे गावातीलच दाजीराम मडावी व त्यांची मुलगी दिपाली मडावी तिला केशोरी येथील जिल्हा परिषद शाळेत स्वत:च्या एमएच-३३-पी-७८०० क्रमांकाच्या दुचाकीने नेऊन देत होते. दरम्यान नान्ही येथे समोरून येणाऱ्या एमएच-३३-जी-१४६६ क्रमांकाच्या बोलेरो महेंद्र पिकअप दुचाकीला जबर धडक दिली. यात दुचाकीस्वार दाजीराम मडावी (४६) हे गंभीर जखमी झाले. तसेच चरणदास जेंगठे (४०) हे सुद्धा जखमी झाले.
दुचाकीन वाहनाने जात असताना विरूद्ध दिशेने येणाऱ्या पीकअप वाहनाने नान्ही फाट्याजवळ दुचाकीला जबर धडक दिली. यात जेंगठे यांच्या डोक्याला प्रचंड दुखापत झाल्याने ते घटनास्थळीच बेशुद्ध झाले. मडावी यांच्या छाती व हाताला दुखापत झाली. या दोन्ही जखमींना लागलीच कुरखेडाच्या उपजिल्हा रुग्णालयात दाखल करण्यात आले. येथे प्राथमिक उपचार केल्यानंतर पुढील उपचारासाठी या दोघांना गडचिरोलीच्या जिल्हा सामान्य रुग्णालयात हलविण्यात आले.
या घटनेची माहिती मिळताच कुरखेडा पोलिसांनी घटनास्थळ गाठून घटनेचा पंचनामा केला. या घटनेची नोंद कुरखेडा पोलीस ठाण्यात करण्यात आली असून या घटनेचा पुढील तपास पोलीस निरीक्षकांच्या मार्गदर्शनाखाली कुरखेडा पोलीस करीत आहेत. गेल्या १५ दिवसांपासून कुरखेडा तालुक्यात अपघात होत आहेत. यापूर्वी अनेकांचा बळीही गेला आहे. (तालुका प्रतिनिधी)

आलापल्ली मार्गावरही अपघात; एक गंभीर
आलापल्ली मार्गावरील हसन बाग हॉटेलसमोर बुधवारी सायंकाळी ६ वाजताच्या सुमारास दोन दुचाकींची समोरासमोर धडक झाल्याने एक युवक गंभीर जखमी झाला. विनोद पेंदाम (२४) रा. वांगेपल्ली असे जखमी युवकाचे नाव आहे. लागलीच पोलीस विभागाच्या वाहनाने जखमी पेंदाम याला अहेरीच्या उपजिल्हा रुग्णालयात हलविण्यात आले. त्यानंतर चंद्रपूरला रेफर केले. जखमी झालेला विनोद पेंदाम हा युवक जिल्हा परिषदेचे माजी सभापती मुतन्ना पेंदाम यांचा पुतण्या होय.