छत्तीसगड सीमेवर १२ नक्षल्यांचा खात्मा, सहा तास जंगलात सुरू होते थरारनाट्य; गडचिरोलीत भीषण चकमक
By ऑनलाइन लोकमत | Published: July 18, 2024 06:07 AM2024-07-18T06:07:27+5:302024-07-18T06:07:52+5:30
दोन्ही उपमुख्यमंत्री जिल्ह्यात असतानाच घडली घटना, उपनिरीक्षक जखमी
![Killing of 12 Naxals on Chhattisgarh border Thriller starts in the forest for six hours | छत्तीसगड सीमेवर १२ नक्षल्यांचा खात्मा, सहा तास जंगलात सुरू होते थरारनाट्य; गडचिरोलीत भीषण चकमक Killing of 12 Naxals on Chhattisgarh border Thriller starts in the forest for six hours | छत्तीसगड सीमेवर १२ नक्षल्यांचा खात्मा, सहा तास जंगलात सुरू होते थरारनाट्य; गडचिरोलीत भीषण चकमक](https://d3pc1xvrcw35tl.cloudfront.net/images/420x315/nakshalwadi_2024071269080.jpg)
छत्तीसगड सीमेवर १२ नक्षल्यांचा खात्मा, सहा तास जंगलात सुरू होते थरारनाट्य; गडचिरोलीत भीषण चकमक
गडचिरोली : जिल्ह्यातील जारावंडी क्षेत्रांतर्गत येत असलेल्या छत्तीसगड सीमेलगतच्या जंगल परिसरात बुधवारी दुपारी २ वाजेच्या सुमारास जवान-नक्षल्यांत चकमक उडाली. यात १२ नक्षल्यांना कंठस्नान घालण्यात जवानांना यश आले. उपनिरीक्षकासह दोघे जखमी झाले. दरम्यान, उपमुख्यमंत्री व गृहमंत्री देवेंद्र फडणवीस व उपमुख्यमंत्री अजित पवार हे जिल्हा दौऱ्यावर होते, त्याचवेळी जंगलात चकमक सुरू होती.
अहेरी तालुक्यातील वडलापेठ येथे स्टीलनिर्मिती प्रकल्पाच्या भूमिपूजनासाठी उपमुख्यमंत्री देवेंद्र फडणवीस, अजित पवार व उद्योगमंत्री उदय सामंत हेलिकॉप्टरने आले होते. कार्यक्रम आटोपून त्यांनी जिल्हा सोडल्यानंतर एटापल्ली तालुक्यातील जारावंडी क्षेत्रांतर्गत येत असलेल्या जंगल परिसरात सी-६० पथकाचे जवान नक्षलविरोधी अभियान राबवीत असताना इंटला गावाजवळ जंगलात दबा धरून असलेल्या नक्षल्यांनी गोळीबार सुरू केला. पोलिसांनीदेखील नक्षल्यांच्या दिशेने गोळीबार केला. या चकमकीत एक पोलिस उपनिरीक्षक जखमी झाले. त्यांना उपचारासाठी हेलिकॉप्टरने नागपूर येथे हलविण्यात आले असून, प्रकृती धोक्याबाहेर आहे. चकमकीत १२ नक्षलवादी ठार झाल्याची माहिती पोलिस अधीक्षक निलोत्पल यांनी दिली. चकमकीनंतर परिसरात शोधमोहीम तीव्र केल्याची माहिती त्यांनी दिली.
उपमुख्यमंत्र्यांनी जाहीर केले ५१ लाखांचे बक्षीस
गेल्या तीन वर्षांतील ही सर्वांत मोठी चकमक असून,
गडचिरोली पोलिसांच्या कामगिरीची उपमुख्यमंत्री देवेंद्र फडणवीस यांनी प्रशंसा केली आहे.
त्यांनी सी-६० जवानांना ५१ लाख रुपयांचे बक्षीस जाहीर केले आहे.
जखमी उपनिरीक्षकाचा पाय फ्रॅक्चर
nपोलिस उपनिरीक्षक सतीश पाटील यांच्या खांद्याला गोळी लागल्याने ते गंभीर जखमी झाले.
nत्यांना हेलिकॉप्टरने नागपुरातील ऑरेंजसिटी हॉस्पिटलमध्ये भरती करण्यात आले. त्यांची प्रकृती धोक्याबाहेर आहे.
१३ नोव्हेंबर २०२१ : कोरची तालुक्यातील गॅरापत्ती पोलिस मदत केंद्र हद्दीतील बोटेझरी- मर्दीनटोला जंगल परिसरात पोलिस व नक्षली समोरासमोर भिडले होते. यात जवानांनी २६ नक्षल्यांना आपल्या बंदुकीचा निशाणा बनवले होते. या आठवणी बुधवारच्या चकमकीमुळे ताज्या झाल्या.
३ एके-४७ सह अनेक शस्त्रे जप्त
जवान व नक्षल्यांमध्ये सहा तास थरारनाट्य चालले. दुपारी १२ वाजेपासून सुरू झालेली चकमक सायंकाळी ६ वाजता थांबली. त्यानंतर शोधमोहीम घेतली असता १२ माओवाद्यांचे मृतदेह आढळून आले. घटनास्थळी ३ एके-४७, २ बंदुका, १ कार्बाईन, १ एसएलआर, ७ ऑटोमोटिव्ह शस्त्रे आढळून आली आहेत. यानंतर तेथे नक्षलविरोधी अभियान अधिक तीव्र करण्यात आले आहे, असे पोलिसांनी सांगितले.
मृतांत विभागीय समिती सदस्य
ठार झालेल्या १२ नक्षलवाद्यांपैकी एकाची ओळख पटली आहे. यात टिपागड (ता. कोरची) दलमच्या विभागीय समितीचा सदस्य लक्ष्मण आत्राम ऊर्फ विशाल आत्राम याचा समावेश आहे. उर्वरित ११ जणांची ओळख पटविण्याचे काम सुरू आहे.
‘त्या’ चकमकींची आठवण ताजी
यापूर्वीही जिल्ह्यात जवान व नक्षल्यांमध्ये चकमकीचे प्रसंग घडलेले आहेत. २२ एप्रिल २०१८ रोजी भामरागड तालुक्यातील कसनासूर व दामरंचा जंगल परिसरात झालेल्या चकमकीत तब्बल ४० नक्षल्यांना पोलिसांनी ठार केले होते. त्याचवर्षी एटापल्ली तालुक्यातील पयडी जंगलात २१ मे २०१८ रोेजी १३ नक्षल्यांचा खात्मा केला होता.