आदिवासी विकास परिषदेच्या विदर्भ उपाध्यक्षपदी मडावी

याप्रसंगी अध्यक्षस्थानी विदर्भ अध्यक्ष ॲड. मनिराम मडावी होते. प्रमुख अतिथी म्हणून महिला अध्यक्ष पुष्पलता आत्राम उपस्थित होत्या. सर्वप्रथम महाराष्ट्र प्रदेश महासचिव दिवंगत आर. यू. केराम व उत्तम कन्नाके यांना श्रद्धांजली वाहण्यात आली. त्यानंतर संघटनेच्या विदर्भ प्रदेश कार्यकारिणीचे पुनर्गठण करण्यात आले. विदर्भ अध्यक्षपदी ॲड. मनिराम मडावी, विदर्भ कार्याध्यक्षपदी नामदेवराव मसराम यांची फेरनिवड झाली. तसेच उपाध्यक्षपदी गडचिरोली जिल्हाध्यक्ष घनश्याम मडावी यांची एकमताने निवड करण्यात आली. विदर्भ महासचिवपदी डॉ. आरती फुफाटे, सचिन पालकर, जयप्रकाश उईके, सचिव चंद्रशेखर मडावी, योगानंद उईके यांची काेअर कमिटीद्वारे सर्वांनुमते निवड करण्यात आली.

(बॉक्स)

समाजासाठी एकदिलाने झटावे

यावेळी घनश्याम मडावी, डॉ. हरिभाऊ फुफाटे, डॉ. विनोद डवले, नरेश गेडाम यांचा सत्कार करण्यात आला. सत्काराला उत्तर देताना घनश्याम मडावी म्हणाले, आदिवासी समाजाच्या अनेक ज्वलंत समस्या प्रलंबित आहेत. त्यामुळे परिषदेच्या पदाधिकाऱ्यांनी आपल्या मनात कोणताही संभ्रम न ठेवता एकदिलाने समाजाच्या विकासासाठी झटावे, असे आवाहन त्यांनी केले.