गळा चिरून किराणा दुकानदाराची हत्या, कोरची तालुक्याती थरारक घटना

दवंडी गावातील घटनेने खळबळ

गडचिरोली : कोरची तालुक्यापासून आठ किमी अंतरावर येत असलेल्या दवंडी गावातील एका किराणा दुकानदाराची पाच ते सहा अज्ञात इसमांनी घरात शिरून धारदार शस्त्राने गळा चिरून हत्या केल्याची थरारक घटना बुधवारी रात्री ११ वाजताच्या सुमारास घडली. लखन सुन्हेर सोनार (वय ३८) असे हत्या झालेल्या इसमाचे नाव आहे.

लखनची पत्नी सरिताने बयाणात दिलेल्या माहितीनुसार बुधवारी रात्री जेवण झाल्यानंतर सोनार कुटुंब झोपी गेले होते. रात्री ११ वाजताच्या सुमारास अचानक दरवाजा ठोठाविण्यात आला. लखन यांची पत्नी सरिता हिने दरवाजा उघडला असता पाच ते सहाच्या संख्येत असलेले व काळे कपडे परिधान केलेले अज्ञात इसम घरात शिरले. सरिताने आरडाओरड करू नये म्हणून तिला चाकूचा धाक दाखविण्यात आला. त्यानंतर कोणताही विचार न करता लखनच्या मानेवर चाकूने वार करण्यात आले. 

लखन हा निपचीत पडला तरी हत्यारे त्याच्यावर चाकूचे वार करीतच होते. काही वेळातच खून करणारे पसार झाले. त्यानंतर सरिताने सभोवतालच्या लोकांना बोलावून घटनेची माहिती दिली. कोरची पोलिसांना कळविण्यात आले. पोलिसांनी घटनास्थळ गाठून पंचनामा केला. लखनचे कोणाशीही वैर नव्हते. तसेच हत्या करणारे काळे कपडे घालून आले होते. चेहऱ्यावरही काळा रुमाल बांधूला होता. त्यामुळे त्यांना ओळखता आले नाही, अशी माहिती सरिता हिने बयाणात दिली. 

लखनच्या मारेकऱ्यांना शोधण्याचे आव्हान कोरची पोलिसांपुढे आहे. मृतक लखन सोनार यांच्या पश्चात पत्नी सरिता, १६ वर्षीय मुलगी पायल व १२ वर्षीय मुलगा प्रणय असे कुटुंब आहे. घटनेचा तपास बेडगाव पोलिस अधिकारी विठ्ठल सूर्यवंशी करीत आहेत.