‘बीएसएनएल’च्या टॉवर्सची संख्या वाढेना

आष्टी : दुर्गम भागात ‘बीएसएनएल’चे अत्यंत कमी टॉवर्स आहेत. त्यामुळे या परिसरातील भ्रमणध्वनींना कव्हरेज मिळत नाही. बीएसएनएलचे जिल्ह्यात सर्वाधिक ग्राहक असून, जास्तीत जास्त टॉवर्स उभारण्याची मागणी होत आहे. गेल्या दहा वर्षात जिल्ह्याची लाेकसंख्या बरीच वाढली. मात्र त्यामानाने बीएसएनएलच्या टॉवर्सची संख्या वाढली नाही.

शौचालयांची याेग्य स्वच्छता नाही

देसाईगंज : तालुक्यासह जिल्ह्यातील शासकीय कार्यालयांच्या शौचालयांत फार मोठी दुर्गंधी निर्माण झाली आहे. त्यामुळे या ठिकाणच्या कर्मचाऱ्यांना प्रचंड त्रास होत आहे. या शौचालयांची तत्काळ दुरुस्ती व स्वच्छता करण्यात यावी, अशी मागणी नागरिकांकडून होत आहे. विविध कार्यालयांतील शाैचालयांत अस्वच्छता दिसून येते.

चामोर्शीत कुशल मजुरांची टंचाई

चामोर्शी : विविध कुशल कामे करताना बांधकाम करण्यासाठी कुशल मजुरांची आवश्यकता आहे. मात्र, कुशल मजुरांची कमतरता आहे. तालुक्यातील अनेक गावांमध्ये दरवर्षी कुशल कामगारांचा तुटवडा जाणवतो. काैशल्य विकासावर आधारित प्रशिक्षण देण्याची आवश्यकता आहे.

पाणी टाकी परिसरातील सुरक्षा वाऱ्यावर

गडचिरोली : शुद्ध व पुरेसा पाण्याचा पुरवठा करण्यासाठी गावांमध्ये पाण्याच्या टाकीचे बांधकाम करण्यात आले आहे; परंतु या टाकीच्या सुरक्षेसाठी स्थानिक प्रशासन गंभीर नसल्याने या टाकीच्या परिसरात घाण साचून राहत आहे. या भागातील नागरिकांनी अनेकदा स्वच्छतेची मागणी केली, मात्र याकडे पालिकेचे दुर्लक्ष हाेत आहे.

विनापरवानगी घरांचे बांधकाम

गडचिरोली : शहरात नगरपरिषद प्रशासनाची परवानगी न घेताच दरवर्षी शेकडो घरे बांधली जात आहेत. या घरांवर नगरपरिषद कोणतीही कारवाई करीत नसल्याने दरवर्षी विनापरवानगी बांधण्यात येणाऱ्या घरांची संख्या शहरात वाढत चालली आहे. घरकुलाचा प्रश्न कायम आहे.

ग्रामीण भागातील वीज खांब धोकादायक

आलापल्ली : अहेरी तालुक्यासह जिल्हाभरात अनेक गावांत अनेक ठिकाणी वीज खांब वाकलेले असून, ताराही लोंबकळत आहेत. यामुळे धोका होण्याची शक्यता निर्माण झाली आहे. परिणामी, नागरिकांमध्ये भीतीचे वातावरण कायम आहे. त्यामुळे वाकलेले वीज खांब व लोंबकळलेल्या तारा सुरळीत कराव्यात, अशी मागणी नागरिकांकडून होत आहे.

दुग्ध संस्थांना आर्थिक मदतीची मागणी

गडचिरोली : अपुऱ्या दूध पुरवठ्यामुळे गडचिरोली जिल्ह्यातील सुमारे ६० पेक्षा अधिक दुग्ध सहकारी संस्था बंद पडल्या आहेत. दुग्ध व्यवसायाला चालना देण्यासाठी दूध उत्पादक शेतकऱ्यांना आर्थिक मदत व मार्गदर्शनाची गरज आहे. मात्र, शासनाचे याकडे दुर्लक्ष झाले आहे. गडचिरोली जिल्ह्यात दूध उत्पादनाला बराच वाव असल्याने याकडे लक्ष देण्याची गरज आहे.

बसस्थानकातील वाहने नियंत्रणाविना

गडचिरोली : येथील बसस्थानक परिसरात प्रवासी, चालक व वाहकांची दुचाकी व चारचाकी वाहने ठेवण्यासाठी स्वतंत्र कडेकोट व्यवस्था नाही, तसेच शेडही नाही. त्यामुळे नागरिक वाहने अस्ताव्यस्त उभी करतात. पोलीस बंदोबस्ताअभावी बसस्थानक परिसरातील खासगी वाहने रात्री नियंत्रणाअभावी बेवारस राहतात. काेणत्याही प्रकारची सुरक्षितता दिसून येत नाही.

शेतकऱ्यांना हस्तलिखित सात-बारा पुरवा

देसाईगंज : ऑनलाईन सात-बारा ग्रामीण भागातील शेतकऱ्यांना डोकेदुखी ठरत असल्याने ग्रामीण भागातील शेतकऱ्यांना हस्तलिखित सात-बारा तलाठी कार्यालयामार्फत पुरवावा, अशी मागणी नागरिकांनी केली आहे. ग्रामीण भागात वीज व इंटरनेटची समस्या सतत सतावत असते. त्यामुळे हस्तलिखित सात-बारा पुरवावा, अशी मागणी शेतकऱ्यांकडून होत आहे.

रुग्णालयासमोरील अतिक्रमण धोकादायक

गडचिरोली : बालरुग्णालयाच्या संरक्षक भिंतीला लागून दुकाने थाटण्यात आली आहेत. बालके पळवून नेण्यासारख्या अनुचित घटना टाळण्यासाठी ही अतिक्रमण हटविणे आवश्यक आहे. अतिक्रमणांमुळे रुग्णालयात ये-जा करणाऱ्या रुग्णवाहिकांनाही अडथळा निर्माण होत आहे. अतिक्रमण हटविण्याची कारवाई करणे गरजेचे आहे.