नदीलगतच्या दारूभट्टीवर पाेलिसांची धाड

शिवणीपाठ-बोरी नदी परिसरात अवैधरित्या गूळ-मोहाचा सडवा टाकून दारू गाळली जात असल्याची गुप्त माहिती मिळाली. माहितीच्या आधारे अहेरी पोलीस व मुक्तिपथ तालुका चमूने नदी परिसरात शोधमोहीम राबविली. दरम्यान, हातभट्ट्या सुरू असल्याचे निदर्शनास आले. पाेलीस व महिलांची चाहूल लागताच काही विक्रेत्यांनी घटनास्थळावरून पळ काढला. घटनास्थळावरून १२ हजार रुपये किमतीची हातभट्टीची दारू, ४ लाख ५० हजार रुपये किमतीचा ४ हजार ५०० लिटर गूळ-मोहफुलाचा सडवा, तसेच ३६ हजार रुपयांचे साहित्य असा एकूण ४ लाख ९८ हजारांचा मुद्देमाल जप्त करण्यात आला.

याप्रकरणी पाच जणांवर गुन्हा दाखल करण्यात आला आहे. ही कारवाई पोलीस निरीक्षक गव्हाणे यांच्या मार्गदर्शनाखाली पोलीस उपनिरीक्षक पाडोळे यांच्या नेतृत्वातील पोलीस पथक व मुक्तिपथ तालुका चमूने केली.