व्हाॅलिबाॅल व कबड्डी स्पर्धेचे बक्षीस वितरण

चामाेर्शी : शहीद वीर बाबूराव शेडमाके, वीर बिरसा मुंडा यांच्या स्मृतिप्रीत्यर्थ येथील शिवाजी कनिष्ठ महाविद्यालयात पोलीस ठाणे यांच्या वतीने व्हाॅलिबाॅल व कबड्डी स्पर्धा घेण्यात आल्या. या स्पर्धेत अनेक संघ सहभागी झाले होते. स्पर्धेतील विजेत्यांना मान्यवरांच्या हस्ते बक्षीस वितरित करण्यात आले.

कार्यक्रमाचे उद्घाटन तहसीलदार शिंगतोडे यांच्या हस्ते झाले. यावेळी सहायक पोलीस निरीक्षक नागनाथ पाटील, पोलीस उपनिरीक्षक निशा खोब्रागडे, सी.बी. किरमे, दीपक शिवणकर, प्रा. संजय मस्के, राकेश खेवले, मनोज बोमनवार, पोलीस उपनिरीक्षक एस.डी. कुडावले, संदीप भिवनकर, संपत मडावी, नंदकिशाेर भांडेकर, दिवाकर मुळे उपस्थित होते.

कबड्डी व व्हाॅलिबाॅल स्पर्धा खेळीमेळीच्या वातावरणात पार पडल्या. पंच म्हणून दीपक शिवणकर, राकेश खेवले, मनोज बोमनवार, संजय मस्के यांनी काम पाहिले. व्हाॅलिबाॅल स्पर्धेत प्रथम क्रमांक फ्रेण्ड्स क्लब, चामोर्शी, द्वितीय क्रमांक केवळराम हरडे काॅलेज, तर तृतीय क्रमांक जय सेवा संघ, पावीमुरांडा यांनी पटकाविला. कबड्डी स्पर्धेत प्रथम क्रमांक जय सेवा संघ, पावीमुरांडा, द्वितीय क्रमांक विद्यार्थी संघ, माेहुर्ली तर तृतीय क्रमांक वीर मराठा संघ चामोर्शी यांनी पटकाविला.