जमिनीचा प्रकार पाहून पीकांची निवड करा

गडचिरोली : जिल्ह्यातील पूरस्थितीनंतरची पाहणी करताना केंद्रीय पथकाने दुसऱ्याही दिवशी काही

गावांना भेटी दिल्या. यावेळी पथकातील सदस्य आणि केंद्रीय कृषी मंत्रालयाचे संचालक

आर.पी.सिंग यांनी पीक निवडीबाबत शेतकऱ्यांशी संवाद साधला. केवळ धानपीक न घेता जमिनीचा प्रकार, वातावरण पाहून पीकांची निवड करा, असा सल्ला त्यांनी दिला.

धान पिकाबरोबरच गडचिरोली जिल्ह्यात करडई, हरभरा तसेच वटाणा अशा पिकांची निवडही करता येईल, असे सिंग म्हणाले. जिल्ह्यात वेगवेगळ्या तीन पथकांनी कनेरी, पारडी, वसा, पोर्ला, लाडज या पूरबाधित क्षेत्रांची पाहणी केली. कनेरी, पारडी व वसा या भागात शेतकऱ्यांशी संवाद

साधून, झालेल्या नुकसानाबाबत चर्चा केली. शुक्रवारी भेटी दिलेल्या पथकात सिंग यांच्यासह केंद्रीय कार्यालय नागपूरचे अधीक्षक अभियंता महेंन्द्र सहारे, तसेच इतर पथकात रमेशकुमार गंटा, आर.बी.कौल यांचा समावेश होता.

कनेरी या गावात गजानन पाणनकर या शेतकऱ्याशी पथकाने संवाद साधला. त्यांच्या शेतात कापूस पिकाचे नुकसान झाले होते. त्याबाबत सविस्तर माहिती घेवून त्या शेताची पाहणीही पथकाने केली. पारडी या गावातील शोभा बोकडे या शेतकऱ्याच्या पूरबाधित क्षेत्राचीही पाहणी पथकाने केली. गोगाव येथील रस्त्यालगत असलेल्या शेतामधील पूरपरिस्थितीनंतर नव्याने लागण केलेल्या करडई या पिकाची पाहणी करून तेथील शेतकऱ्यांशी

चर्चा केली. शेवटी वसा येथील कुमरे यांच्या शेतीमधील धान कापणीनंतरची परिस्थिती प्रत्यक्ष शेतात जावून पाहिली. यावेळी शेतकऱ्यांनी झालेल्या नुकसानाची माहिती सदस्यांना सांगितली.

गडचिरोली कृषी उत्पन्न बाजार समितीला भेट

(फोटो)

केंद्रीय पथकातील सदस्य आर.पी.सिंग यांनी कृषी उत्पन्न बाजार समिती गडचिरेाली येथे भेट देवून धान खरेदी प्रक्रिया पाहिली. यावेळी पूरबाधित क्षेत्रातून आलेल्या धान विक्री करणाऱ्या शेतकऱ्यांशीही त्यांनी संवाद साधला. धान खरेदी केंद्रावरील प्रक्रिया जाणून घेत असताना धानाची गुणवत्ता व

शेतकऱ्यांना देण्यात येणारा मोबदला याबाबत पथकातील सदस्यांनी माहिती जाणून घेतली. यावेळी बाजार समितीचे प्रशासक चंद्रशेखर भडांगे व नंदू कुमरे यांनी समितीच्या कामकाजाबाबत माहिती दिली. पथकाबरोबर तहसीलदार महेंद्र गणवीर, कृषी विज्ञान केंद्राचे संचालक डॉ.संदीप कऱ्हाळे, आपत्ती व्यवस्थापन अधिकारी कृष्णा रेड्डी, सहकार अधिकारी रंधये उपस्थित होते.