अन् प्रेमासाठी पत्नीनेच केला पतीचा 'गेम'; प्रियकराच्या मदतीने हत्या, 'असा' झाला उलगडा

दवंडी प्रकरणाला धक्कादायक कलाटणी: तिघांना अटक, बेडगाव पोलिसांनी केला उलगडा

गडचिरोली : कोरची तालुक्यातील दवंडी गावातील एका किराणा दुकानदाराची निर्घृण हत्या केल्याची घटना ११ ऑक्टोबरला रात्री घडली होती. या सिनेस्टाइल खुनाचा उलगडा करण्यात अखेर बेडगाव पोलिसांना यश आले. अनैतिक संबंधात अडथळा ठरणाऱ्या पतीचा पत्नीनेच प्रियकर व अन्य एकाच्या मदतीने नियोजनबध्दपणे काटा काढला. १३ ऑक्टोबरच्या रात्री पोलिसांनी तिन्ही आरोपींना जेरबंद केले आहे.

लखन सुन्हेर सोनार (वय ३८) असे मृताचे नाव आहे.  त्यांचे गावात किराणा दुकान होते. ११ ऑक्टोबरला रात्री मारेकऱ्यांनी दरवाजाची कडी ठोठावली. पत्नीने दरवाजा उघडल्यावर तिला ढकलून देत तोंडाला काळे कपडे बांधून आलेल्या पाच ते सहा जणांनी खाटेवर झोपलेल्या लखन यांच्या गळ्यावर धारदार शस्त्राने वार करून खून केला. त्यानंतर मारेकऱ्यांनी पोबारा केला. पाच ते सहा जण तोंडाला काळे कपडे बांधून आले होते. पत्नी सरिता हिने अशा आशयाची फिर्याद दिल्यावरुन अज्ञात पाच ते सहा इसमांविरोधात बेडगाव पोलिस मदत केंद्रात खुनाचा गुन्हा दाखल करण्यात आला होता.

या गावात काही वर्षांपूर्वी दोन निरपराध व्यक्तींची नक्षल्यांनी हत्या केली होती, त्यामुळे पोलिस सर्व बाजूंनी तपास करत होते. अखेर या प्रकरणात फिर्यादी असलेली पत्नी सरिताने प्रियकर बळीराम गावडे (रा. कुडकेल ता. कोरची) व त्याचा सहकारी सुभाष नंदेश्वर (रा.दवंडी) याच्या मदतीने पती लखनची हत्या घडवून आणली.  पोलिसांनी या तिघांनाही बेड्या ठोकल्या असून त्यांनी खुनाची कबुली दिली आहे. १४ ऑक्टोबर रोजी त्यांना कोरची न्यायालयात हजर करण्यात आले आहे. 

वडील गेले, आई तुरुंगात, दोन भावंडे प्रेमाला पारखी

अनैतिक संबंधातून झालेल्या हत्याकांडाने या कुटुंबाची वाताहत झाली. लखन हे जिवानिशी गेले. पत्नी सरिता कारागृहात गेली. या दाम्पत्यास दोन आपत्ये आहेत. मुलगी पायल (१६), मुलगा प्रणय (१२) हे जन्मदात्याच्या प्रेमाला पारखी झाली आहेत.

त्या रात्री नेमके काय घडले?

१३ ऑक्टोबरच्या रात्री सरिता व लखन एका खोलीत झोपले होते. मुलगी पायल व व मुलगा प्रणय हे वेगळ्या खोलीत होते. सरिता व बळीराम गावडे यांचे अनैतिक संबंध होते. त्यात लखन अडथळा ठरत होता. हा अडथळा दूर करण्यासाठी त्याचा खून करण्याचा कट पत्नी सरिता व बळीराम गावडे यांनी रचला, त्यासाठी सुभाष नंदेश्वरचीही मदत घेेतली. आधीच ठरल्याप्रमाणे सरिताने रात्री झोपताना घराच्या दरवाजाची आतून कडी न लावता फक्त लोटून घेतला. त्यानंतर दारुच्या नशेत बळीराम गावडे व सुभाष नंदेश्वर यांनी घरात प्रवेश करुन धारदार शस्त्राने झोपेतच लखनच्या गळ्यावर वार करुन निर्घृण हत्या केली.  मारेकरी पळून गेल्यावर सरिताने आरडाओरड करुन अज्ञातांनी पतीला संपविल्याचा बोभाटा केला.

दवंडी येथील खून प्रकरणात सुरुवातीला धागेदोरे हाती लागत नव्हते, पण तपास करण्यात यश आले. फिर्यादी असलेल्या पत्नीनेच प्रियकर व त्याच्या साथीदाराच्या सहाय्याने पतीला संपविले. तिन्ही आरोपींना जेरबंद केले असून अधिक तपास सुरु आहे.

- नीलोत्पल, पोलिस अधीक्षक