आदिवासी महामंडळात रिक्त पदांचे ग्रहण कायम

गडचिरोली येथील प्रादेशिक कार्यालयात व्यवस्थापकासह उपव्यवस्थापक विपणन निरीक्षक व इतर सर्व मिळून एकूण ३१ पदे मंजूर आहेत. यापैकी १४ पदे भरण्यात आली असून १५ वर पदे रिक्त आहेत. रिक्त पदांमध्ये व्यवस्थापक (प्रशासन) दोन पदे, उपव्यवस्थापक तीन पदे, लेखापालाची पाच, कनिष्ठ सहायकाची दोन, टंकलिपिकाची तसेच गोदामपाल व इतरही पदे रिक्त आहेत. कुरखेडा उपप्रादेशिक कार्यालयात एकूण ४० पदे मंजूर आहेत. यापैकी केवळ माेजकीच पदे नियमित स्वरूपात भरण्यात आली आहे. येथे बरीच पदे रिक्त आहेत. उपप्रादेशिक व्यवस्थापकास विपणन निरीक्षकाची आठ व इतर पदे रिक्त आहेत. घोट उपप्रादेशिक कार्यालयांतर्गत ३६ पदे मंजूर असून केवळ तीन पदे भरण्यात आले आहेत. या कार्यालयात ३० पदे रिक्त आहे. यामध्ये विपणन निरीक्षकाची सात, कनिष्ठ सहायक विक्रेत्याची तीन, रखवालदार व इतर पदांचा समावेश आहे. धानोरा उपप्रादेशिक कार्यालयात एकूण ३८ पदे मंजूर असून सहा पदे भरण्यात आली आहे. उर्वरित पदे रिक्त आहेत. आरमोरी उपप्रादेशिक कार्यालयांतर्गत एकूण ३६ पदे मंजूर आहेत. यापैकी केवळ पाच पदे भरण्यात आली असून २५ पेक्षा अधिक पदे गेल्या अनेक वर्षांपासून रिक्त आहे. उपप्रादेशिक कार्यालय कोरची अंतर्गत ३९ पदे मंजूर आहेत. यापैकी काही पदे भरण्यात आली असून ३० पदे रिक्त आहे. रिक्त पदांमध्ये विपणन निरीक्षक, कनिष्ठ सहायक, रखवालदार व इतर पदांचा समावेश आहे.

आदिवासी विकास महामंडळांतर्गत आविका संस्थेच्या वतीने गडचिरोली कार्यालयाच्या क्षेत्रामध्ये दरवर्षी खरीप हंगामात ५० धान खरेदी केंद्र सुरू केली जातात. या धानाच्या हुंड्या काढण्यापासून ऑनलाईन चुकारे, इतर कामेे करावी लागतात. मात्र या कार्यालयात मोठ्या प्रमाणात पदे रिक्त असल्याने कार्यरत अधिकारी व कर्मचाऱ्यांवर कामाचा अतिरिक्त ताण येत आहे.