वाघाच्या हल्ल्यात महिला ठार; गडचिरोली शहरानजिकच्या घटनेने नागरिकांमध्ये दहशत

इंदिरानगरातील सुधाबाई आणि इतर पाच महिला चांदाळा मार्गावर असलेल्या जंगलात सरपण गाेळा करण्यासाठी गेल्या हाेत्या.

गडचिराेली : सरपण गाेळा करण्यासाठी जंगलात गेलेल्या महिलेवर वाघाने हल्ला केल्याने ती महिला जागीच ठार झाल्याची घटना बुधवारी दुपारी १ वाजताच्या सुमारास गडचिराेली शहरापासून अवघ्या एक किमी अंतरावर घडली. सुधाबाई अशाेक चिलमवार (४७) रा.इंदिरागनगर गडचिराेली असे मृत महिलेचे नाव आहे.

इंदिरानगरातील सुधाबाई आणि इतर पाच महिला चांदाळा मार्गावर असलेल्या जंगलात सरपण गाेळा करण्यासाठी गेल्या हाेत्या. दरम्यान सुधाबाईवर वाघाने हल्ला करून तिला ठार केले. इंदिरानगरातील नागरिकांनी घटनास्थळाकडे धाव घेत सुधाबाईचा शाेध घेतला असता, हल्ला केलेल्या ठिकाणापासून जवळपास १०० मीटर अंतरावर तिचा मृतदेह आढळून आला. गडचिराेली शहरापासून केवळ एक किमी अंतरावर सदर घटना घडल्याने घटनास्थळावर नागरिकांची मोठी गर्दी जमली असून काहीसी दहशतही पसरली आहे. सुधाबाईच्या पश्चात पती व एक मुलगी आहे.