रेल्वेच्या धडकेत २४ वर्षीय तरुणाचा मृत्यू

वास्को: गुरावारी (दि.२५) दुपारी वास्कोतील आयओसी जंक्शनजवळ असलेल्या रेल्वे रुळावर एका तरुणाचा डोके कापलेल्या अवस्थेत मृतदेह वास्को पोलीसांना आढळला. रेल्वेची धडक बसल्याने त्याचा मृत्यू झाल्याचे पोलीसांना चौकशीवेळी आढळले. मुरगाव उपविभागाचे पोलीस उपअधीक्षक सलीम शेख यांनी दिलेल्या माहीतीनुसार दुपारी १ च्या सुमारास त्यांना रेल्वे रुळावर एका इसम पडलेला असल्याची माहीती मिळाली.

वास्को पोलीस उपनिरीक्षक विभा वळवईकर यांनी त्वरित घटनास्थळी पोचून तपासणी केली असता तो इसम मृतअवस्थेत असल्याचे आढळून आले. त्याचे धड आणि डोके वेगळे होऊन मृतदेह रेल्वे रुळावर पडला होता. त्या इसमाची रेल्वेला धडक बसल्याने त्याचा मृत्यू झाल्याचे चौकशीवेळी पोलीसांना आढळून आले. वास्को पोलीसांनी अधिक चौकशी केली असता मृतअवस्थेत आढळलेल्या त्या तरुणाचे नाव रामनाथ राजवर (वय २४) असे असून तो बार्देस येथे एका व्यवस्थापनात कामगार म्हणून काम करायचा.

तो मूळचा पच्छीम बंगाल येथील असल्याची माहीती पोलीसांना चौकशीवेळी प्राप्त झाली. वास्को पोलीसांनी घटनेचा आणि मयत रामनाथ च्या मृतदेहाचा पंचनामा करून नंतर त्याचा मृतदेह दक्षिण गोवा जिल्हा इस्पितळाच्या शवगृहात पाठवून दिला. वास्को पोलीस स्थानकाच्या उपनिरीक्षक विभा वळवईकर अधिक तपास करीत आहेत.