मित्रांसमवेत गोव्यात सहलीसाठी आलेला आंध्र प्रदेशातील एकजण हॉटेलात मृतावस्थेत

पोलिसांनी घटनास्थळी जाऊन चौकशी केली असता, मयताने तीन दिवस भरपूर दारु प्यायली होती.

सूरज नाईकपवार / मडगाव

मडगाव: आपल्या मित्रांसमवेत गोव्यात सहलीसाठी आलेला आंध्र प्रदेश राज्यातील एक तीस वर्षीय इसम येथील एका हॉटेलच्या खोलीत मृतावस्थेत सापडला. मुरली मोहन रेड्डी असे मयताचे नाव आहे. अन्य दोन मित्रांसमवेत तो मागच्या शनिवारी गोव्यात आला होता. मडगावातील एका हॉटेलमध्ये ते रहात होते.

पोलिसांनी घटनास्थळी जाऊन चौकशी केली असता, मयताने तीन दिवस भरपूर दारु प्यायली होती, त्याने जेवणही घेतले नव्हते. त्याला सतत उलट्या होत होत्या. मंगळवारी दि. १० रोजी रात्री त्याने उलट्या थांबविणारी गोळी घेतली होती नंतर तो झोपी गेला होता. दुसऱ्या दिवशी त्याच्या मित्राने त्याला उठविण्याचा प्रयत्न केला तो काहीच हालचाल करीत नसल्याचे आढळून आल्यानंतर १०८ मदत सेवेला बोलाविले असता, तो मृत पावल्याचे स्पष्ट झाले. अनैसर्गिक मृत्यू म्हणून पोलिसांनी वरील प्रकरण नोंदवून घेतले आहे. मृतदेह दक्षिण गोवा जिल्हा इस्पितळाच्या शवागारात ठेवला आहे. मडगाव पोलिस ठाण्याचे पोलिस निरीक्षक तुळशीदास नाईक यांच्या मार्गदर्शनाखाली उपनिरीक्षक विश्वजित ढवळीकर पुढील तपास करीत आहेत.