दुचाकीवरील नियंत्रण सुटून उस्ते-सत्तरीत युवक ठार 

दुचाकीवरील नियंत्रण सुटून झालेल्या अपघातात युवकाचा मृत्यू झाला. सत्तरी तालुक्यातील उस्ते - नगरगाव येथे सोमवारी दुपारी हा अपघात घडला.

गोवा, वाळपई : दुचाकीवरील नियंत्रण सुटून झालेल्या अपघातात युवकाचा मृत्यू झाला. सत्तरी तालुक्यातील उस्ते - नगरगाव येथे सोमवारी दुपारी हा अपघात घडला. या अपघातात दीपक राम गांवकर (३८ रा. उस्ते) याचा जागीच मृत्यू झाला. 

पोलिसांनी सांगितले की, दीपक गावकर हे वरचा वाडा उस्ते येथून आपल्या ऑक्टिवा स्कूटरने घरी जात होते. उस्ते येथील उतारावर त्याचे स्कुटरवरील नियंत्रण सुटले आणि स्कूटर रस्त्याच्या बाजूला असलेल्या वीज खांबावर आदळली. त्यात तो गंभीर जखमी झाला आणि त्याचा जागीच मृत्यू झाला.
 
वाळपई सरकारी रुग्णालयात त्याला आणण्यात आले. त्यावेळी डॉक्टरांनी त्याला मृत घोषित केले. उत्तरीय तपासणीसाठी मृतदेह  गोमेकॉत येथे पाठविण्यात आला आहे. वाळपई पोलिसांनी घटनेचा पंचनामा केला. त्याच्या पश्चात बायको, आई व भाऊ असा परिवार आहे. तो खाजगी काम करुन आपला उदरनिर्वाह करीत असे.