१० मिनिटे रडली, ५ मिनिटे भांडली; सूचना व पती व्येंकटरमण यांचे एकमेकांवर आरोप-प्रत्यारोप

दोघांत भांडण झाले.

लोकमत न्यूज नेटवर्क, पणजी : आपला चार वर्षांचा मुलगा चिन्मयचा खून करणारी संशयित सूचना शेठ व तिचे विभक्त पती वेंकटरमण यांना रविवारी समोरासमोर आणल्यानंतर त्यांच्यात कळंगुट पोलिस स्थानकामध्ये वाद झाला. दोघांनी परस्परांवर आरोप-प्रत्यारोप केल्याचा प्रकार घडला. यावेळी काही काळ भावनावश झालेल्या सूचनाला रडू कोसळले. त्यानंतर दोघांत भांडण झाले.

संशयित सूचनाचे पती वेंकटरमण यांना पोलिसांनी चौकशीसाठी समन्स बजावल्यानंतर ते शनिवारी वकिलांसोबत पोलिस स्थानकात दाखल झाले होते. पोलिसांनी यावेळी त्यांचा पाच पानी जबाब नोंदवला. त्यानंतर रविवारी सूचना व वेंकटरमण यांना भेटण्यासाठी १५ मिनिटांचा वेळ पोलिसांनी दिला. यावेळी सूचनाने आपण पोलिस कोठडीत असून, तुम्हाला आता पूर्ण मोकळीक असल्याचे वेंकटरमणला सुनावले, तर वेंकटरमण यांनी सूचना हिला आपल्या मुलाचा खून तू का केला, याचा जाब विचारला. मात्र, सूचना हिने आपण चिन्मयचा खून केला नसल्याचे सांगत वेंकटरमण यांनाच काही घटनांबाबत दोष दिला. त्यामुळे काही वेळासाठी दोघांमध्ये शाब्दिक वाद झाल्याचे समजते.

दरम्यान, संशयित सूचनाला आपलाच चारवर्षीय मुलगा चिन्मयच्या खूनप्रकरणी अटक झाली असून, कळंगुट पोलिस तिची कसून चौकशी करीत आहेत. जेथे मुलाच्या खुनाचा प्रकार घडला, त्या सिकेरी येथील हॉटेलमध्ये सूचना हिला नेऊन पोलिसांनी पुन्हा एकदा घटनेची उजळणी केली. यात सूचना हिने पोलिसांना सहकार्य केले. मात्र, तिने अजूनही खून केल्याची कबुली दिलेली नाही. सूचना व तिचा पती वेंकटरमण यांच्यात घटस्फोटाची प्रक्रिया सुरू आहे. मात्र, दोघांमध्ये पटत नव्हते. आपल्या मुलाला पतीला भेटण्याची संधी मिळू नये यासाठी सूचनाने पतीवरचा राग मुलावर काढून त्याचा खून केल्याचे म्हटले जात आहे.