सिकेरी- कळंगुट येथे ८ लाखाचा गांजा जप्त

कळंगुट पोलिसांनी  सिकेरी येथे छापा मारून ८ लाख रुपये किंमतीचा ८ किलो वजनाचा गांजा जप्त केला आहे.

काशीराम म्हांबरे, म्हापसा: कळंगुट पोलिसांनी  सिकेरी येथे छापा मारून ८ लाख रुपये किंमतीचा ८ किलो वजनाचा गांजा जप्त केला आहे. या प्रकरणात संशयित दीपक रावत ( ३५ वय, ओडीशा) याला अटक करण्यात आली आहे.

निरीक्षक परेश नाईक यांनी दिलेल्या माहितीनुसार सिकेरी येथे  संशयित  गांजा घेऊन येणार असल्याची माहिती उपलब्ध झाल्यानंतर त्याचा अटक करण्यासाठी उपनिरीक्षक  परेश सिनारी यांच्या नेतृत्वाखाली सापळा रचण्यात आला. ग्राहकाच्या प्रतीक्षेत असताना त्याला ताब्यात घेण्यात आले.
आज शुक्रवारी ही कारवाई करण्यात आली.  त्याच्या विरोधात एनडीपीएस कायद्याच्या कलम १९८५ अंतर्गत गुन्हा दाखल करण्यात आला आहे. संशयिताला रिमांडासाठी उद्या न्यायालयात  उपस्थित केले जाणार आहे. या मोहिमेत हवालदार विद्यानंद आमोणकर, कॉन्स्टेबल अमीर गरड, गणपत तिळोजी, आकाश नाईक यांनी महत्वाची भुमीका बजावली. पुढील तपास कार्य सुरु करण्यात आले आहे.