Goa: गोवा ते आंबोली घाट चित्तथरारक प्रवास, मोरजी किनाऱ्यासाठी गोव्याला पुरस्कार

Goa News: पर्यटन क्षेत्रात चमकणाय्रा गोवा राज्याने आणखी एक पाऊल पुढे टाकत चित्तथरारक प्रवासासाठी सर्वोत्कृष्ट आंतरराज्य ‘रोड ट्रिप रूट्स’ तसेच सर्वोत्तम ‘बीच डेस्टिनेशन’चे आउटलुक ट्रॅव्हलर अवॉर्ड्स पटकावले आहेत.

- किशोर कुबल 
पणजी - पर्यटन क्षेत्रात चमकणाय्रा गोवा राज्याने आणखी एक पाऊल पुढे टाकत चित्तथरारक प्रवासासाठी सर्वोत्कृष्ट आंतरराज्य ‘रोड ट्रिप रूट्स’ तसेच सर्वोत्तम ‘बीच डेस्टिनेशन’चे आउटलुक ट्रॅव्हलर अवॉर्ड्स पटकावले आहेत.

गोवा ते शेजारी महाराष्ट्रातील आंबोली घाट (सिंधुदुर्ग) या चित्तथरारक प्रवासासाठी गोव्याला सर्वोत्कृष्ट आंतरराज्य ‘रोड ट्रिप रूट्स’चा पुरस्कार मिळाला आहे तर प्रसिध्द मोरजी किनाय्राने देशातील सर्वोत्तम ‘बीच डेस्टिनेशन’चा किताब मिळवला आहे. या यशाबद्दल मुख्यमंत्री प्रमोद सावंत यांनी पर्यटन खाते अभिनंदन करताना गोवा पर्यटनाच चमकतच राहील, असे म्हटले आहे. पर्यटनाशी संबंधित सर्व घटकांच्या प्रयत्नांनी हे यश मळाले आहे असे नमूद करुन त्यांनी सर्वांचे आभार मानले आहेत.

आउटलुक रिस्पॉन्सिबल टुरिझमच्या प्रकल्प व्यवस्थापिक नबिहा तस्नीम यांच्या नेतृत्वाखाली "गोवा बियॉन्ड बीचेस" या विषयावरील चर्चासत्राच्यावेळी एका भव्य कार्यक्रमात पुरस्कार प्रदान करण्यात आले. पर्यटनमंत्री रोहन खंवटे यांनी पुरस्कार स्विकारला. खंवटे यांनी गोव्यात किनाय्रांव्यतिरिक्तही अनेक स्थळे पाहण्यासारखी आहेत अशी नमूद करुन पर्यटनाच्या विविध पैलूंबद्दल माहिती दिली. गोवा समृद्ध संस्कृती आणि स्वादिष्ट खाद्यपदार्थांचा खजिना आहे.

पर्यटन मंत्र्यांनी गोव्यातील गावांचे सौंदर्य शोधण्याच्या महत्त्वावर भर दिला तसेच राज्याच्या अर्थव्यवस्थेतील पर्यटनाची महत्त्वाची भूमिका अधोरेखित केली. खंवटे म्हणाले की, ‘हे पुरस्कार भारतातील प्रमुख पर्यटन स्थळ म्हणून आपले स्थान मजबूत करण्यासाठी गोव्याची कटिबद्धता दर्शवितो.’