Goa: विना हेल्मेट दुचाकीने जाणारा तरुण अपघातात गंभीर जखमी

Goa Accident News: शांतीनगर महामार्गावर दुचाकी आणि प्रवासी बस यांच्यात झालेल्या अपघातात २२ वर्षीय रोहन नाईक नामक तरुण गंभीररित्या जखमी झाल्याने त्याला उपचारासाठी बांबोळीच्या गोमॅकॉ इस्पितळात दाखल केला आहे.

-पंकज शेट्ये 
वास्को - शांतीनगर महामार्गावर दुचाकी आणि प्रवासी बस यांच्यात झालेल्या अपघातात २२ वर्षीय रोहन नाईक नामक तरुण गंभीररित्या जखमी झाल्याने त्याला उपचारासाठी बांबोळीच्या गोमॅकॉ इस्पितळात दाखल केला आहे. शांतीनगर महामार्गावरून भरधाव वेगाना जाताना रोहन ची दुचाकी घसरून तो रस्त्यावर कोसळून गंभीर जखमी झाला तर त्याची दुचाकी फरफटत जाऊन बसखाली आली. अपघातावेळी रोहनने हॅल्मेट घातले नसल्याने त्याच्या डोक्याला गंभीर जखमा झाल्याची माहीती अपघाताच्या ठीकाणी उपस्थित असलेल्या काही लोकांनी दिली.

वास्को पोलीसांनी दिलेल्या माहीतीनुसार शुक्रवारी (दि.२४) संध्याकाळी ३.४० च्या सुमारास तो अपघात घडला. बोगदा, सडा येथे राहणारा रोहन दुचाकीने दाबोळी विमानतळा बाहेरील महामार्गावरून वरुणापूरी जंक्शनच्या दिशेने जात होता. भरधाव वेगाने शांतीनगर महामार्गावरून जाताना अचानक रोहनचा दुचाकीवरून तोल जाऊन तो आणि त्याची दुचाकी रस्त्यावर कोसळली. रोहन दुचाकीवरून खाली कोसळल्याने गंभीर जखमी झाला. त्याची दुचाकी रस्त्यावर कोसळल्यानंतर काही अंतर रस्त्यावरून फरफट जाऊन पुढे प्रवाशांना घेऊन जाणाऱ्या खासगी प्रवासी बसखाली आली. मागून काहीतरी धडकल्याचे बस चालकाला समजताच त्यांनी त्वरित बस थांबवून तो खाली उतरला असता रोहन गंभीररित्या जखमी होऊन रस्त्यावर पडल्याचे त्याला दिसून आले. दुचाकी - बस यांच्यात झालेल्या अपघातात गंभीररित्या जखमी झालेल्या रोहन याला नंतर त्वरित उपचारासाठी बांबोळीच्या गोमॅकॉ इस्पितळात नेण्यात आले. वास्को पोलीसांनी अपघाताचा पंचनामा केला असून त्याप्रकरणात अधिक तपास चालू आहे.