वीजमंत्र्यांविरुध्दच्या बेहिशोबी मालमत्ता प्रकरणात लोकायुक्तांसमोर उद्या सुनावणी

वीजमंत्री पांडुरंग मडकईकर यांच्याविरुध्दच्या बेहिशोबी मालमत्ता प्रकरणात लोकायुक्तांसमोर उद्या सोमवारी पुढील सुनावणी होणार आहे.

पणजी  - वीजमंत्री पांडुरंग मडकईकर यांच्याविरुध्दच्या बेहिशोबी मालमत्ता प्रकरणात लोकायुक्तांसमोर उद्या सोमवारी पुढील सुनावणी होणार आहे. लोकायुक्त पी. के. मिश्रा यांनी गेल्या महिन्यात मंत्री मडकईकर तसेच मुख्य सचिव व दक्षता खात्याच्या लांच लुचपतविरोधी विभागाच्या अधिक्षकांना नोटिसा बजावल्या होत्या. 

आयरिश रॉड्रिग्स यांनी सादर केलेल्या तक्रारीच्या अनुषंगाने वरील तिघांना त्यांचे म्हणणे मांडण्यास सांगितले आहे. या प्रकरणात लांचलुचपतविरोधी विभागाला फाइल्स परत करण्याचे निर्देशही देण्यात आले आहेत. आयरिश यांनी या प्रकरणात दक्षता खात्याच्या लांच लुचपतविरोधी विभागाकडे तक्रार केली होती. परंतु या विभागाने कोणतीही कारवाई न केल्याने अखेर त्यांनी लोकायुक्तांकडे धाव घेतली. मडकईकर यांनी जुने गोवें येथे बॉ जिझस बासिलिका चर्चजवळ सुमारे २00 कोटी रुपये खर्चून बांधलेल्या आलिशान बंगल्याचा हवाला देऊन आयरिश यांनी ही तक्रार केली होती. 

जेनिता या जुने गोवे ग्रामपंचायतीच्या सरपंच आहेत. या उभयतांविरुध्द १९८८ च्या भ्रष्टाचार प्रतिबंधक कायद्याच्या कलम १३ (१) (ड) आणि भारतीय दंड संहितेच्या कलम १२0 (ब) खाली गुन्हे नोंद करून लाचलुचपत विभागाला या प्रकरणात सखोल चौकशी करण्याचे आदेश द्यावेत, अशी आयरिश यांची मागणी आहे. २0१५-१६ च्या आयकर विवरणपत्रात मंत्री मडकईकर यांनी  स्वत:चे वार्षिक उत्पन्न १,४४,३८९ रुपये एवढे अल्प उत्पन्न दाखवले आहे. असे  असताना २00 कोटींचा आलिशान बंगला बांधला कसा, असा प्रश्न आयरिश यांनी उपस्थित केला आहे. मडकईकर हे सध्या आजारी असून मुंबईतील खाजगी इस्पितळात वैद्यकीय उपचार घेत आहेत.