भावाला मी पाठिंबा देणार नाही: आमदार विरेश बोरकर

बंधू साईश बोरकर याच्या विरुद्ध नोंदविण्यात आलेल्या गुन्ह्याच्या संदर्भात विधान केले आहे.

पणजी: माझ्या भावाने जर गुन्हा केला असेल तर तो केवळ माझा भाऊ आहे या कारणासाठी मी त्याला पाठिंबा देणार नाही’ असे आमदार विरेश बोरकर यांनी आपला बंधू  साईश बोरकर याच्या विरुद्ध नोंदविण्यात आलेल्या गुन्ह्याच्या संदर्भात म्हटले आहे. साईशसह तिघांविरुद्ध महिलेचा पाठलाग केल्याचा व घरात घुसून मारहाण केल्याचा गुन्हा नोंदविण्यात आला आहे.

गुन्हा दाखल करण्यात आलेला आमदार बोरकर याचा भाऊ साईश याच्या मुद्द्यावरून आमदार बोरकर याच्या विरुद्ध तसेच त्याच्या रिव्होल्युशनरी गोवन्स पक्षावर टीका केली जात होती. मात्र साईश याच्या प्रकरणातून आमदार बोरकर यांनी आपल्याला वेगळे केले आहे. एका जारी केलेल्या व्हिडिओत ते म्हणतात की या घटनेमुळे ते स्वत: आणि त्याचे कुटुंबियही दुखावले आहेत. आपण स्वत: कायद्याचा सन्मान करतो. त्यामुळे आपल्या भावाने कायदा हाती घेण्याचा प्रयत्न केला तर त्याला पाठिशी घालण्याचा प्रस्नच उद्भवत नाही. तसेच या बाबतीत पोलीस तपासात आपण कोणताच हस्तक्षेप करणार नाही असे त्यांनी म्हटले आहे. ते म्हणतात की ‘माझ्या मतदारांनीही या बाबतीत कोणताच संकोच  बाळगू नये. तसेच आरजी पक्षाच्या कार्यकर्त्यांनीही कोणताही संदेह बाळगू नये. यावरील माझी भुमिका स्पष्ट आहे’. 

महिलेचा पाठलाग करून तिला मारहाण केल्याप्रकरणी   साईश बोरकर याच्यासह तिघांविरुद्ध आगशी पोलिसांनी गुन्हा नोंदविला होता. साईश बोरकर याच्याविरुद्ध बेकायदेशीरपणे तक्रारदाराच्या खासगी मालमत्तेत घुसण्याचा आणि तक्रारदार महिलेशी असभ्य वर्तन केल्याचा त्यांच्यावर ठपका आहे.  साईश  याच्याविरुद्ध भारती दंडसंहिता कलम ५०४, ३२३, ५०६, ४४७ अंतर्गत गुन्हा नोंदविला आहे